پتری ١٥ ملیار دیناران بۆ ھەموو خزمەتگۆزاریێن زاخۆ ھاتنە تەرخانکرن
زاخۆ-KDP.info- سەرپەرشتێ ئیدارا سەربەخۆ یا زاخۆ دیار کر کو ل سەر ڕاسپاردا سەرۆکێ حکومەتا کوردستانێ پتری ١٥ ملیار دینار بۆ ھەمی پرۆژێن خزمەتگۆزاری یێن ئیدارا سەربەخۆ یا زاخۆ ھاتنە تەرخانکرن.
گوھدار شێخۆ، سەرپەرشتێ ئیدارا سەربەخۆ یا زاخۆ د کۆنگرەکێ رۆژنامەڤانی دا دیار کر کو ب مەرەما گەھاندنا ھەموو خزمەتگۆزاریان بۆ خەلکێ سنوورێ ئیدارا سەربەخۆ یا زاخۆ کۆژمێ ١٥ ملیار و ٥٤٠ ملیۆن دینار ل سەر ڕاسپاردا سەرۆکێ حکومەتا کوردستانێ بۆ ئیدارا ناڤھاتی ب ھەر دو قەزایێن وێ ڤە (زاخۆ) و (باتیفا) ھاتنە تەرخانکرن و گۆت: "ڕێژا ٤٥٪ ژ گوژمێ ھاتیە تەرخانکرن بۆ قەزا باتیفایە و ڕێژا ٥٥٪ ژ کوژمێ گشتی ھاتیە تەرخانکرن بۆ چێکرنا جادەیێن ناڤخۆ و سەرەکیێن گوندانە ل سنوورێ ئیدارا سەربەخۆ یا زاخۆ".
ناڤھاتی ئاماژە دا وێ چەندێ کو ٥١ پرۆژێن جوراوجور یێن خزمەتگۆزاری دێ ب ڤی کوژمێ ھاتیە تەرخانکرن ل سنوورێ ئیدارا سەربەخۆ یا زاخۆ ھێنە چێکرن، ژ وانا (٤٤) پرۆژێن سالا ٢٠٢٢ێ نە و حەفت پرۆژێن بەردەوامێن ژ سالا ٢٠١٣ ھەتا سالا ٢٠٢٢ ێ نە و گۆت: "کوژمێ ١٣ ملیار و ٧١٨ ملیۆن دینار ژ کوژمێ گشتی بۆ ٤٤ پرۆژێن سالا ٢٠٢٢ ھاتینە تەرخانکرن و کوژمێ ملیارەک و ٨٢٢ ملیۆن دینار بۆ بەردەوامیا حەفت پرۆژێن سالا ٢٠٢٢ێ نە".
رێوار محەمەد رەشید
