ئەمریکا سوبەھی دێ دەست ب نووژەنکرنا دەرگەھێ ئامێدیێ کەت
دھۆک –KDP.info- رێڤەبەرێ شوونواران ل پارێزگەھا دھۆکێ دیار کر کو ب مەرەما پاراستنا دەرگەھێ (بەھدینان) یێ قەزا ئامێدیێ وەکو جھەکێ شوونواری ل دەڤەرێ سوبەھی رۆژا سێشەمبی ١٠/٥/٢٠٢٢ دێ دەست ب نووژەنکرنا دەرگەھێ ناڤھاتی ھێتەکرن.
د.بێکەس بریفکانی، رێڤەبەرێ شوونواران ل پارێزگەھا دھۆکێ بۆ ماڵپەڕێ فەرمیێ پارتی دیموکراتی کوردستان ئاشکرا کر کو پشتی بزاڤێن بەردەوام ژ لایێ رێڤەبەریا شوونوارێن پارێزگەھا دھۆکێ ڤە بۆ نووژەنکرنا دەرگەھێ (بەھدینان) یێ شوونواری ل قەزا ئامێدیێ ھاتینەکرن و ل ھەیاما بۆری قۆنسلێ گشتی یێ قۆنسلخانا ئەمریکا ل ھەرێما کوردستانێ سەرەدانا دەڤەرا ئامێدیێ کری، بڕیار ھاتەدان (٥٠٠) ھزار دۆلار ل سەر بۆدجا وەزارەتا دەرڤە یا ئەمریکا بۆ پاراستنا دەرگەھێ ناڤھاتی بھێنە تەرخانکرن و ب خوەشحالی ڤە سوبەھی ئەڤ پرۆژە دێ چیتە د بوارێ بجھئینانێ دا.
رێڤەبەرێ شوونواران ل پارێزگەھا دھۆکێ ئاماژە دا وێ چەندێ ژی کو ھەر جھەکێ مێژووی و شوونواری بھێتە نووژەنکرن، دەمێ ب دووماھی ھاتنا پرۆژەی ناھێتە دیارکرن، ژ بەر کو نابیت لەز د ڤان جورە پرۆژان دا بھێتەکرن و دڤێت ل سەر شێوەیێ وان یێ بەرێ بھێنە نووژەنکرن، بەلێ ھندی سەقا یێ گونجایی بیت دێ ژ سوبەھی وێڤە کار د نووژەنکرنا دەرگەھێ (بەھدینان) یێ مێژووی ل دەڤەرا ئامێدیێ دا یێ بەردەوام بیت و ھەر دەمێ ب دووماھی ھات دێ کەڤیتە د خزمەتا خەلکێ دەڤەرێ و گەشتیاران دا.
رێوار محەمەد رەشید
