دەلیڤێن کاری بۆ کرێکارێن دهۆکێ زێدەبووینە
دھۆک -KDP.info- سەرۆکێ ئێکەتیا سەندیکایێن کرێکارێن کوردستانێ تایێ دھۆکێ دیار کر کو ژ ئەگەرێ چێکرنا پرۆژێن نوی یێن خزمەتگۆزاری و ڤەکرنا کارگەھان ل سەر دەمێ کابینا نەھێ یا حکومەتا ھەرێما کوردستانێ دەلیڤێن کاری بۆ کرێکاران ب رێژەکا بەرچاڤ ژ سالێن بۆری ل پارێزگەھا دھۆکێ زێدەتر لێ ھاتینە و گۆت: "ب ھەلکەفتا ئێکی ئەیارێ رۆژا جیھانیا کرێکاران ل رۆژێن بۆری مە چەندین چالاکیێن جوراوجور ئەنجامداینە و ئەڤرۆ رۆژا ئێکشەمبی ١/٥/٢٠٢٢ ژی ب مەرەما ساخکرنا رۆژا ناڤھاتی دێ بەردەوامیێ دەینە ئەنجامدانا چالاکیێن خوە".
وەلات ئەمین ئۆزمانی، سەرۆکێ ئێکەتیا سەندیکایێن کرێکارێن کوردستانێ تایێ دھۆکێ بۆ ماڵپەرێ فەرمیێ پارتی دیموکراتی کوردستان دیار کر کو وان پانۆرامایەکا چالاکیان ب ھەلکەفتا رۆژا جیھانی یا کرێکاران ل رۆژێن بۆری ل سەرانسەری پارێزگەھا دھۆکێ ئەنجامدایە ژوان ژی سەرەدانا چەندین کرێکاران ل جھێ وان یێ کاری ھاتیەکرن و ھاریکاری ل دووڤ شیانان ل سەر ھاتینە بەلاڤکرن، ھەروەسا چەندین کەرەستێن ئاھێن خوارنێ ل سەر کرێکارێن کێم دەرامەت ھاتینە بەلاڤکرن و ئەڤرۆ رۆژا ئێکشەمبی ١/٥/٢٠٢٢ ژی ب ھەمان ھەلکەفت دێ چەندین کرێکار ل جھێن جودا جودا یێن پارێزگەھا دھۆکێ ھێنە خەلاتکرن و گۆت: "ل ھەیا بۆری ب مەرەما پاراستنا مافێن کرێکاران مە چەندین پرۆژە پێشکێشی حکومەتا ھەرێما کوردستانێ کرینە وەکو پرۆژێ خانەنشینکرن و دەستەبەرکرنا جڤاکی کو نوکە قووناغا رەشنڤیسی ب دووماھی ھاتیە و گەھشتیە پەرلەمانێ کوردستانێ داکو دەنگدان ل سەر بھێتەکرن و ب کەڤیتە د بوارێ بجئینانێ دا و دخوازین ب زووترین دەم ئەڤ پێنگاڤە ژ لایێ حکومەتا ھەرێما کوردستانێ ڤە د بەرژەوەندیا کرێکاران دا بھێتە ھاڤێتن، ھەروەسا دخوازین حکومەتا ھەرێمێ ئەردی بۆ پرۆژێ چێکرنا یەکەیێن ئاکجیبوونێ بۆ کرێکارێن کێم دەرامەت تەرخان بکەت داکو ئەڤ پرۆژە ژی بچیتە د بوارێ بجھئینانێ دا و کرێکار ژێ مفاداربن".
ناڤھاتی ئاماژە دا وێ چەندێ کو دناڤبەرا ٩٠ ھەتا ١٠٠ ھزار کرێکاران ل پارێزگەھا دھۆکێ ھەنە کو ژ خەلکێ پارێزگەھێ و ئاوارە و پەنابەران پێکدھێن و ئەڤ ژمارە بەردەوام د گوھۆڕینێ دانە ژ بەر کو سالانە ناسنامێن وان یێن سەندیکایێ دھێنە نووکرن، ئەڤە ددەمەکی دایە کو ژمارەکا کرێکاران ل پارێزگەھا دھۆکێ ھاتینە خانەنشینکرن و ھندەک ژوان ژی د پەککەفتی نە و گۆت: "د سالا ٢٠٢٢ ێ دا دو کرێکاران ل دەمێ کاری ل پارێزگەھا دھۆکێ گیانێ خوە ژ دەست دایە و کرێکارەک ژی پەککەفتی بوویە".
سەرۆکێ ئێکەتیا سەندیکایێن کرێکارێن کوردستانێ تایێ دھۆکێ خویا کر کو ھاتنا ئاوارە و پەنابەران ب شێوەیەکێ بەربەلاڤ بۆ پارێزگەھا دھۆکێ کرێیا کرێکارێن خەلکێ پارێزگەھا دھۆکێ کێمکریە، بۆ کرێکارێن ئاوارە و پەنابەر د گونجیت ب کرێیەکا کێم کاربکەت ژ بەر کو چو باج و کرێیان نادەن، بەلێ بۆ کرێکارێ خەلکێ پارێزگەھا دھۆکێ ناگۆنجیت ب وی بھایێ کێم کار بکەت، ژ بەر ڤێ چەندێ پێدڤیە کارکرنا کرێکارێن ئاوارە و پەنابەر و بیانی ب رێیا رێڤەبەریێن پەیوەندیدار پتر بھێتە رێکخستن ئەڤە ددەمەکی دایە ل دووڤ رێنمایێن وەبەرھێنانێ دڤێت ٧٥% یا کرێکارێن ل ھەرێما کوردستانێ کاردکەن خەلکێ پارێزگەھێن ھەرێمێ ب خوە بن و ٢٥% یێن بیانی بن و گۆت: "ل سەر دەمێ کابینا نەھێ یا حکومەتا ھەرێما کوردستانێ دەلیڤێن کاری بۆ کرێکاران ب رێژەکا بەرچاڤ ژ سالێن بۆری پتر لێ ھاتینە و ئەم د وێ باوەرێ داینە ئەڤ دەلیڤە دێ پتر ژی لێ ھێن ب ڤەکرنا وان پرۆژێن نوکە ل پارێزگەە دھۆکێ د قووناغا بجھئینانێ دا ژ وان پرۆژێ تێرمینالا دھۆکێ کو دێ پتری ھزار دەلیڤێن کاری بۆ کرێکاران لێ پەیدابن، ھەروەسا کارگەھا بەرھەمێن پتاتان ل بەردەرەش و کارگەھا سپیاتیان و ھتد.... و بەردەوام ژی پلانێن باش بۆ پەیداکرنا دەلیڤێن زێدەتر یێن کاری ژ لایێ حکومەتا ھەرێمێ ڤە دھێنە دانان".
ل دووماھیێ وەلاتی دیار کر کو دگەل پەیداکرنا دەلیڤێن زێدەتر یێن کاری بۆ کرێکاران، دڤێت مافێن کرێکاری ب دروستاھی بھێنە دان و کرێکار پتری وان دەمژمێرێن کارکرنێ یێن بۆ ھاتینە دیارکرن و کێمتر ژ وی مووچێ بۆ ھاتیە دەستنیاشنکرن کارنەکەت و ھەکە خودان کارەک مافێ وی نەدەتێ بلا ب رێکێن یاسایی داخوازا مافێن خوە بکەت.
رێوار محەمەد رەشید
