ئەمساڵ قۆناغی یەکەمی ٦٠ مەتری سۆران جێبەجێ دەکرێت
سۆران -KDP.info- بە گوتەی سەرپەرشتیاری ئیدارەی سەربەخۆی سۆران، ئەمساڵ پڕۆژەی ٦٠ مەتریی سۆران دەچێتە بواری جێبەجێکردن و دەشڵێت، پڕۆژەکە ستراتیژییە و کاریگەریی لەسەر پێگەی ئابووری و کەرتی وەبەرھێنانیش دەبێت.
ھەلگۆرد شێخ نەجیب، سەرپەرشتیاری ئیدارەی سۆران، بە ماڵپەڕی فەرمیی پارتی دیموکراتی کوردستانی ڕاگەیاند: "پلان بۆ دروستکردنی شەقامی ٦٠ مەتریی سۆران ئامادە کراوە و یەکێکە لە پڕۆژە ستراتیژییەکانی ئیدارەی سەربەخۆی سۆران و بڕیارە ئەمساڵ قۆناغی یەکەمی پڕۆژەکە بکەوێتە بواری جێبەجێکردن کە درێژییەکەی ٢٦ کیلۆمەترە و لەوانەیە پێداچوونەوەی بۆ بکرێت و درێژیی پڕۆژەکە زیاتریش بکرێت.''
سەرپەرشتیاری ئیدارەی سەربەخۆی سۆران گوتیشی: "شەقامی ٦٠ مەتریی سۆران گرینگیی خۆی بۆ ئیدارەی سۆران بەگشتی و شاری سۆران دەبێت، چونکە سۆران پێگەیەکی بازرگانی ھەیە و ڕێگایەکی سەرەکییە بۆ کۆماری ئیسلامیی ئیران.''
ھەلگۆرد شێخ نەجیب ڕوونی کردەوە: ''پڕۆژەکە پێگەی سۆران بەھێز دەکات، چونکە بە دیزاین و ستانداردێکی پێشکەوتوو دروست دەکرێت و کاریگەریی لەسەر بازاڕ و کەرتی وەبەرھێنان دەبێت لە سۆران، ئەوە جگە لە کارئاسانیی ھاتوچۆ بۆ دانیشتووان و ڕێبوارانی سۆران.''
قائید میرۆ
