زارا ساڵح: بەریتانیا دەزانێ ھەرێمی کوردستان دەڤەرێکی سیاسیی و ئابووری گرنگی ناوچەکەیە
ھەولێر-KDP.info- شارەزاییەکی سیاسه‌تی بەریتانیا دەڵێ، ئەمجارە حکوومەتی بەریتانیا گرنگییەکی زۆری بە سەردانەکەی مەسرور بارزانی دا و پێشوازییەکی کەم وێنەی لێکرا و سەرۆکوەزیرانی ھەرێمیش زۆرترین چاوپێکەوتنی لەگەڵ وەزیرەکانی کابینەکەی بۆریس جۆنسۆن ئەنجامدا.
زارا ساڵح شارەزا لە سیاسەتی بەریتانیا، بۆ ماڵپەڕی فەرمیی پارتی دیموکراتی کوردستان گوتی: "ئێستا بەریتانیا دەیەوێت پەیوەندییەکانی لەگەڵ ھەرێمی کوردستان پتەو و بەھێز بکات، بەتایبەت دوای ڕووداوەکانی ساڵی ٢٠١٧، چونکە دەزانێ ھەرێمی کوردستان دەڤەرێکی سیاسیی و ئابووری گرنگی ناوچەکەیە".
ھاوکات دەشڵێ: "زۆر لایەن ھەن حکوومەتی بەریتانیا و ھەرێمی کوردستان پێکەوە ببەستێتەوە و ھاوکاری یەکتری بکەن لەوانەش بواری سیاسی، چونکە بەریتانیا دەیەوێ لاپه‌ڕه‌یه‌كی نوێ لەگەڵ ھەرێمی کوردستان بکاتەوە".
زارا ساڵح ئاماژەیشدا: "ئێستا بەریتانیا دەزانێ پەیوەندییەکانی ھەرێمی کوردستان لە ڕووی نێودەوڵەتی ھەن بۆیه دەیەوێ لە سەر ھەمان ڕێکچە پەیوەندییەکانی لەگەڵ هه‌رێمی کوردستان باشتر بکات".
ھەروەھا ئاماژەی بەوەشدا: "لەم سەردانەدا باسی كۆمه‌ڵێ پرسی گرینگ كراوه، چونکە ئێستا وڵاتان بە گرنگییەوە تەماشای کورد دەکەن و دەزانن کورد تێکشکێنەری داعشه و دەبێ کوردانیش دەرفەت بقۆزنەوە بۆ بەدەستھێنانی مافەکانییان".
کـــاروان بــاعەدری
