پارێزگارێ دھۆکێ: حەزژێکرنا وەلاتی و نەتەوەیی چوجاران کێم و کەڤن نابیت

دھۆک-KDP.info- پارێزگارێ دھۆکێ دیار کر کو کۆمەکا چالاکڤانان فێری وێ چەندێ بووینە بتنێ دڤێت تشتێ نەرێنی بێژن و پشتەڤانیێ ل گۆتنێن نەرێنی بکەن و د ناڤ جڤاکی دا بەلاڤ بکەن، وەکو ئازادیا ڕادەربڕینێ مافێ وانە وەکو مە ھزر بکەن، بەلێ مە ژی ماف یێ ھەی وەکو وان ھزر نەکەین، حەزژێکرنا وەلاتی و نەتەوەیی چوجاران کەڤن نابیت و نابیت کێم ژی ببیت.

پ.د.عەلی تەتەر، پارێزگارێ دھۆکێ ئەڤرۆ رۆژا پێنجشەمبی ٢١/٤/٢٠٢٢ پشکداری د دەھەمین فیستەڤالا رۆژنامەگەریا کوردی دا ل باژێرێ دھۆکێ کر یا کو ژ لایێ پشکا تەکنیکێن راگەھاندنێ ل کۆلیژا تەکنیکی کارگێری یا زانکۆیا پۆلیتەکنیکی یا دھۆکێ ڤە ھاتیە گێڕان، پشتی ب ھەلکەفتا ٢٢ی نیسانێ سال رۆژا دامەزراندنا رۆژنامەگەریا کوردی پیرۆزباھی ل ھەمی رۆژنامەڤانێن کوردستانێ کری د پەیڤەکێ دا دیار کر کو یا گرنگە ئەم ل سەر رێبازا دەرچوونا رۆژناما کوردستان ب راوەستین، ئارمانج و فەلسەفا دەرچوونا ڤێ رۆژنامێ و دامەزرێنەرێن ئێکەم رۆژناما کوردی ئەم ھزر تێدا بکەین و دھەمان دەم دا ژی ئەم بزانین ئەڤ سالێن ئەم تێدا دژین جیھان ب لەزاتیەکا مەزن گوھۆڕینان ب خوەڤە دبینت و ئەڤ سالە وەکو بەری ٢٠ سالان نینە، گوھۆڕینێن گەلەک بلەز یێن پەیدادبن و کارتێکرنا وان گوھۆڕینان د بوارێ رۆژنامەڤانیێ ژی دا یا دیارە و دشیان دایە ئەو گوھۆڕین ببنە ئەگەرێ ھندەک گوھۆڕینێن دی یێن گەلەک کوویر د بوارێن جڤاکی و ئابووری و سیاسی و ھتد.... دا و گۆت: " چەندین بابەت د رۆژناما کوردستان دا ھەبوون گەلەک د گرنگ بوون ژوان ژی تەوەرێ نشتیمانی و نەتەوەی ل چەندین جھان ئاماژە پێَ ھاتیەکرن، مەرەم ژ دەرچوونا ڤێ رۆژنامێ ھشیارکرنا کوردایە ژبن دەستێ زولما رومیان، ھەروەسا تەروەرێ ئایینی ژی د ڤێ رۆژنامێ دا یێ ئاشکرایە و تێدا داخواز ژ مەلایان ھاتیەکرن ب ئەرکێ خوە راببن و ئەو زولما ل کوردان دھێتەکرن قەبوول نەکەن، ھەروەسا د ھەمان رۆژنامە دا گەلەک دووپاتی ل سەر وێ چەندێ ھاتیەکرن مللەتێ کورد ب رێیا خواندنێ و خواندنگەھان ھشیار بیت، ھەروەسا راسپاردا سیاسی یا رۆژناما کوردستان پشتی خۆلا نوی یا رۆژنامێ ل دووماھیا سالێن جەنگێ جیھانی یێ ئێکێ ئاماژە ب وێ چەندێ دھێتەکرن کو رۆژناما ناڤھاتی بۆ دەربڕینێ ژ بوچوونا رێکخراوەکا سیاسی بوویە ئانکو نیمچە ئورگانەکا رێکخراوەکا سیاسی بوویە".
پارێزگارێ دھۆکێ خویا کر کو ئەو پەرەنسیپێن ل وی دەمی رۆژناما کوردستان ل سەر ھاتیە دانان دگەل ئەڤرۆ چو جوداھیەک نینە دڤێت ئەم جارەکا دی بۆ بزڤرین، نشتیمان پەروەری نەشەرمە و نە ژی کەڤن دبیت و د ناڤ چو وەلاتان ژی دا کەڤن نابیت حەزژێکرنا وەلاتی و نەتەوەیی چوجاران کەڤن نابیت و دەمێ وێ ژی ب سەرڤە ناچیت و نابیت کێم ژی ببیت و راستی ژی دێ ھێنە دیارکرن، بەلێ تێبینەیەکا بچووک د نوکە دا بکەین د شەرێ رووسیا و ئوکراینا دا رۆژنامەڤانیا رووسیا ل کیڤەیە و رۆژنامەڤانیا ئوکراینا ل کیڤەیە سیاسەتێن ھەر دو وەلاتان بەرامبەر رۆژنامەڤانان ب چو شێوەنە پتریا وەلاتێن جیھانێ دژی ڤی شەری نە، بەلێ رۆژنامەڤانێن وان ژ سیاسەتا وەلاتێ خوە یا نەتەوەیی دەرناکەڤن و رێ ژی ناھێتە دان رۆژنامەڤان ئاسایشا نەتەوەیی یا وی وەلاتی بێخیتە د مەترسیێ دا و ژێ بدەرکەڤیت، دووماھی شەرێ ل ھەرێما کوردستانێ ھاتیەکرن ھندەک رۆژنامەڤانان کامیرێن تەلەڤزیۆنان ئێخستبوونە دگەل وی لایەنێ ھێرشبەر بۆ کوردستانێ، ئانکو ئێکسەر تو یێ خیانەتێ دکەی ھەکە تو چوویە دگەل دۆژمنی، بێ بەرپرسیاتی و ھەست ب وێ چەندێ بکەن ئەنجامێن ڤێ چەندێ بۆ سەر ھەرێما کوردستانێ و جڤاکی دێ چبن، نوکە تشتەکێ پەیدابووی بناڤێ سوشیال میدیایێ ئەم ژی یێن دبینە پێخوارنەک بۆ وان ئەجندایا بۆ بەلاڤکرنا وان تشتا کو دێ بیروباوەرێن مە بەرامبەر وەلاتێ مە و دوزا مللەتێ مە لاواز کەت، نابیت خەلەتیێن حزبان کارتێکرنێ ل وەلاتێ مە بکەن و خەلەتیێن کەسێن د ناڤ جڤاکێ مە دا نابیت ببنە ئەگەرێ دل ساربوونا مە ژ وەلاتێ مە، ئایا پێگوھۆڕێ پێشمەرگێن قەھرەمان کیە، پێگوھۆڕ بۆ پاراستنا کوردستانێ و ئازادیا تاکە کەسی کیە، کۆمەکا چالاکڤانان فێری وێ چەندێ بووینە بتنێ دڤێت تشتێ نەرێنی بێژن و پشتەڤانیێ ل گۆتنێن نەرێنی بکەن و د ناڤ جڤاکی دا بەلاڤ بکەن، وەکو ئازادیا ڕادەربڕینێ مافێ وانە وەکو مە ھزر بکەن، بەلێ مە ژی ماف یێ ھەی وەکو وان ھزر نەکەین، ل دەمەکی نڤیسین رێزگرتن بۆ و دگۆتنە نڤیسینێ ئەدەبیات و رەوشت، بەلێ ئەوا نوکە بەلاڤ دبیت نە رەوشتە و نە ژی ئەدەبیاتە.
رێوار محەمەد رەشید