نێچیرڤان بارزانى سه‌رسالا ئێزدییان پیرۆز دكه‌ت
جه‌ژنا سه‌رسالا ئێزدییان ـ چارشه‌مبوا سۆر ـ ب گه‌رمى ل هه‌مى خوشك و برایێن ئێزدى ل كوردستانێ و ل هه‌ر ده‌را جیهانێ بن، پیرۆز دكه‌م، هیڤیدارم جه‌ژنه‌كا ته‌نا و ئارام ده‌رباس بكه‌ن و هه‌رسال ب خێر و خۆشى ڤه‌گه‌ڕیت.
د ڤێ جه‌ژنێدا جاره‌كا دى هه‌مى خوشك و برایێن ئێزدى پشتڕاست دكه‌ین كو هندى ڕه‌ڤاندییه‌ك ئێزدى مابیت، هه‌ولێن مه یێن ژبۆ ڕزگاركرنا وان و دیاركرنا چاره‌نڤیسا وندایان دێ به‌رده‌وام بن، هه‌روه‌سا هه‌مى پشته‌ڤانیێ ل مافێن ئێزدییان، ئاڤه‌دانكرنا جهێن وان و مسۆگه‌رییا ئارامى و ته‌ناهییا وان دكه‌ین، ژبۆ ڤێ یه‌كێ ژى به‌رده‌وام دگه‌ل ئالى یێن عیراقى و نێڤده‌وله‌تى كار دكه‌ین.
جه‌ژنا ئیسال ژى مخابن د ده‌مه‌كێدا تێت كو هێشتا هژماره‌كا مه‌زنا خوشك و برایێن مه یێن ئێزدى ژیانا خۆ ل كه‌مپا ده‌رباس دكه‌ن. ئه‌م ب ڕێز و پێزانین ل خۆڕاگریا ئێزدییان دنێڕین و هیڤیدارین جه‌ژن و هه‌لكه‌فتنێن بێن، د ڕه‌وشێن باشتردا ڤه‌گه‌ڕن و هه‌مى ئێزدى ب ئارامى ڤه‌گه‌ڕیابن سه‌ر وار و جهێن خۆ یێن ته‌نا و ئاڤه‌دانكرى.
هه‌ر ب ڤێ هه‌لكه‌فتێ، جاره‌كا دى خوشك و برایێن خۆ یێن ئێزدى و هه‌مى ئۆل و نه‌ته‌وه و پێكهاتێن گه‌لێ كوردستانێ پشتڕاست دكه‌ین كو وه‌ك هه‌رتم كوردستان دێ وارێ لێبوورین، هه‌ڤقه‌بوولكرن و پێكڤه‌ژیانه‌كا ئاشتیانه مینیت و ئه‌م هه‌مى پێكڤه دێ پارێزه‌رێن ڤێ كولتوورێ و مافێن ده‌ستوورى یێن گه‌لێ كوردستانێ بین.
سه‌رسالا هه‌میان پیرۆز بیت و هه‌ر شاد بن.
نێچیرڤان بارزانى
سه‌رۆكێ هه‌رێما كوردستانێ
2022/4/19
