٩٤% کار د چێکرنا بەنداڤا (خەنس) دا ب دووماھی ھاتیە
دھۆک-KDP.info- سەرپەرشتێ پرۆژێ بەنداڤا (خەنس) دیار کر کو ٩٤% کار د چێکرنا بەنداڤا (خەنس) دا یا کو د کەڤیتە سنوورێ قەزا شێخان ب دووماھی ھاتیە و ژڤانە ل ھەیڤا گۆلانێ یا ئەڤ سالە کار د بەنداڤا ناڤھاتی دا ب دووماھی بھێت و بەنداڤ بھێتە پڕکرن و بکەڤیتە د خزمەتا خەلکێ دەڤەرێ دا.
ئەندازیار عەبدولقادر محەمەد سالح، سەرپەرشتێ پرۆژێ بەنداڤا (خەنس) بۆ مالپەرێ فەرمیێ پارتی دیموکراتی کوردستان ئاشکرا کر کو پشتی بۆ دەمێ شەش سالان ژ ئەگەرێ قەیرانا دارایی کار د چێکرنا بەنداڤا (خەنس) دا ھاتیە راوەستاندن، ل رۆژا ١/٩/٢٠٢١ ب بڕیارا سەرۆکێ حکومەتا ھەرێما کوردستانێ دووبارە دەست ب تمامکرنا ڤی پرۆژەی ھاتەکرن و ھەتا نوکە ب رێژا ٩٤% کار د چێکرنا پرۆژێ بەنداڤا ناڤھاتی دا ب دووماھی ھاتیە و ژڤانە ل رۆژا ٢٨/٥/٢٠٢٢ ھەکە چو ئاریشێن تەکنیکی پەیدانەبن ئەڤ پرۆژە ب دووماھی بھێت و دەست ب پڕکرنا بەنداڤێ بھێتەکرن و گۆت: "نەە ملیار و ٢١٨ ملیۆن دینار بۆ تمامکرنا ڤی پرۆژەیی ژ لایێ حکومەتا ھەرێما کوردتانێ ڤە ھاتینە تەرخانکرن کو بلنداھیا ڤێ بەنداڤێ ٣٤ مەترن و درێژاھیا وێ ١٤٥ مەترن".
ناڤھاتی ئاماژە دا وێ چەندێ کو د شیانێن بەنداڤا (خەسن) دایە نێزیکی ٦.٧ ملیۆن مەترێن چارگۆشە یێن ئاڤێ عمبار بکەت و گۆت: "خەلکێ دەڤەرا شێخان دشێت ئاڤا بەنداڤا (خەنس) بۆ مەرەمێن چاندنێ ژی بکاربینت، د ھەمان دەم دا بۆ مەرەمێن گەشتیاری ژی دێ مفا ژ ڤێ بەنداڤێ ھێتە وەرگرتن".
رێوار محەمەد رەشید
