پرۆسا بایۆمەتری و بەلاڤکرنا کارتێن دەنگدانێ ل دھۆکێ دەستپێکر
دھۆک-KDP.info- سەرۆکێ ئۆفیسا دھۆک یا کۆمسیۆنا بلندا سەربەخوەیا ھەلبژارتن و راپرسیان ل عیراقێ دەستپێکرنا پرۆسا بایۆمەتری و بەلاڤکرنا کارتێن دەنگدانێ ل دھۆکێ ڕاگەھاند و گۆت: "د ئەڤ سالە تۆمارا بایۆمەتری یا دەنگدانێ دێ بۆ ژدایکبوویێن سالا ٢٠٠٤ێ ژی ھێتە چێکرن".
خالد عەباس، سەرۆکێ ئۆفیسا دھۆک یا کۆمسیۆنا بلندا سەربەخۆیا ھەلبژارتن و راپرسیان ل عیراقێ د کۆنگرەکێ رۆژنامەڤانی دا دیار کر کو پشتی ب دووماھی ھاتنا پرۆرسا ھەلبژارتنێن جڤاتا نوونەرێن عیراقێ ل سالا ٢٠٢١ ێ ل رۆژا ١/٥/٢٠٢١ تۆمارا بایۆمەتری یا دەنگدانێ ھاتبوو راوەستاندن و ئوفیسا دھۆک یا کومسیۆنا بلندا سەربەخوەیا ھەلبژارتنان ل عیراقێ ٧٤% ژ دەنگدەرێن پارێزگەھا دھۆکێ ل دووڤ سیستەمێ بایۆمەتری یێ ھەلبژارتنان تۆمارکربوون، بەلێ ئەنجومەنێ کۆمسیاران ل دووڤ بڕیارەکێ ل رۆژا ٢٠/٣/٢٠٢٢ ب گرنگ زانی ل ھەموو عیراقێ و ئۆفیسا ناڤھاتی دووبارە دەست ب تۆمارکرنا بایۆمەتری و بەلاڤکرنا کارتێن دەنگدانێ بھێتەکرن ڤە و بۆ ڤێ مەرەمێ ژی وان بنگەھێن خوە یێن تۆمارکرنا بایۆمەتری و بەلاڤکرنا کارتێن دەنگدانێ راسپاردینە کو ژ رۆژا ئێکشەمب ھەتا رۆژا پێنجشەمبێ ژ دەمژمێر ٩:٠٠ سپێدێ ھەتا دەمژمێر ٢:٠٠ نیڤرۆ د ڤەکری بن و د خزمەتا دەنگدەران دا بن".
ناڤھاتی ئاماژە دا وێ چەندێ کو د ئەڤ سالە دا ژدایکبوویێن سالا ٢٠٠٤ێ ژی ماف یێ ھەیی سەرەدانا بنگەھێن ئوفیسا دھۆک یا کۆمسیۆنا بلندا سەربەخۆیا ھەلبژارتن و راپرسیان ل عیراقێ بکەن داکو تۆمارا بایۆمەتری بۆ بھێتە ئەنجامدان، د ھەمان دەم دا دێ کارتێن بایۆمەتری ژی ل ھەر ٤١ بنگەھێن ناڤھاتی ھێنە بەلاڤکرن و گۆت: " بەری نوکە ٩٣% ژ خەلکێ پارێزگەھا دھۆکێ کارتێن خوە یێن بایۆمەتری وەرگرتبوون، بەلێ نێزیکی ٣٥ ھزار کارتان بەری ھەلبژارتنێن سالا بۆری یێن جڤاتا نوونەرێن عیراقێ مە ڤەگەڕاندبوونە بەغدا، نوکە ئەو دەنگدەرێن کارتێن خوە وەرنەگرتین دشێن سەرەدانا بنگەھێن مە یێن تۆمارا بایۆمەتری بکەن بۆ وەرگرتنا کارتێن خوە، ھەروەسا داخوازێ ژ ھێزێن پێشمەرگەی و ئێمناھیێ و زێرەڤانیێ دکەین یێن کو کارتێن خوە وەرنەگرتین ئەو ژی سەرەدانا ھەمان بنگەە بکەن بۆ وەرگرتنا کارتێن خوە یێن بایۆمەتری، ھەروەسا کارتێن ئاواران ژی ل بنگەھێن بایۆمەتری یێن دەنگدانێ ل پارێزگەھا دھۆکێ ھەنە ئەو ژی ب رێیا تیمێن گەرۆک یێن ئۆفیسا مە دێ ل سەر ئاواران ھێنە بەلاڤکرن".
ل دووماھیێ سەرۆکێ ئۆفیسا دھۆک یا کۆمسیۆنا بلندا سەربەخۆیا ھەلبژارتن و راپرسیان ل عیراقێ خویا کر کو ژڤانە د ڤێ حەفتیێ دا چەکێ وەرگرتنا پارێ کارمەندێن ل سەر سندوقێن دەنگدانێ ل رۆژا ھەلبژارتنێن جڤاتا نوونەرێن عیراقێ یێن سالا بۆری ژ بەغدا بگەھیتە ھەولێرێ و دێ ھەمی بزاڤ ھێنەکرن بەری جەژنا رەمەزانا پیرۆز ئەڤ پارە بھێتە مەزاختن.
رێوار محەمەد رەشید
