بەرێ بنیاتی بۆ پێنج پرۆژان ل ئامێدیێ ھاتە دانان و چار پرۆژە ژی ھاتنە ڤەکرن
دھۆک-KDP.info- د بەردەوامیا چێکرنا پرۆژێن خزمەتگۆزاری دا یێن کو ل سەردەمێ کابینا نەھێ یا حکومەتا ھەرێما کوردستانێ دھێنە چێکرن ئەڤرۆ رۆژا چارشەمبی ١٦/٣/٢٠٢٢ (پ.د.عەلی تەتەر) پارێزگارێ دھۆکێ چار پرۆژێن خزمەتگۆزاری ل قەزا ئامێدیێ ڤەکرن و بەرێ بنیاتی بۆ پێنج پرۆژێن دی ل ھەمان قەزا دانا.
پ.د.عەلی تەتەر، پارێزگارێ دھۆکێ د کۆنگرەکێ رۆژنامەڤانی دا دیار کر کو پشتی سەرەدانا سەرۆکێ حکومەتا ھەرێما کوردستانێ بۆ قەزا ئامێدیێ نوکە ٩٨ پرۆژێن خزمەتگۆزاری کەفتینە د بوارێ بجھئینانێ دا و ھەتا نوکە ٦٤ پرۆژە ب دووماھی ھاتینە و ئەو پرۆژێن مای ژی کار د چێکرنا وان دا یێ بەردەوامە و گۆت: "ئەو پرۆژێن ژ سالا بۆری و ھەتا نوکە بەرێ بنیاتی بۆ ل قەزا ئامێدیێ ھاتینە دانان ب کوژمێ پتری ٣٠٠ ملیار دینارانە".
پارێزگارێ دھۆکێ ئاماژە دا وێ چەندێ کو پرۆژێ دوساید کرنا رێیا سیارەتیکا ھەتا دوسایدێ دێرەلۆکێ د پلانا حکومەتا ھەرێما کوردستانێ دایە بھێتە چێکرن و کارگێریا پارێزگەھا دھۆکێ د دەمێ بۆری دا ئێک ملیار دینار بۆ دیزاینا دوسایدێ ناڤھاتی تەرخانکربوون و ھەر دەمێ کاودان د ھاریکاربوون دێ دەست بجھئینانا وی پرۆژەی ژی ھێتەکرن و گۆت:"ئەڤرۆ ژی مە چار پرۆژێن خزمەتگۆزاری ل قەزا ئامێدیێ ڤەکرن و بەرێ بنیاتی ژی بۆ پێنج پرۆژێن دی یێن خزمەتگۆزاری ل ھەمان قەزا دانا و ل ئایندەکێ نێزیک ئەڤ پرۆژە ژی دێ کەڤنە د خزمەتا خەلکێ دەڤەرێ دا".
رێوار محەمەد رەشید
