پارێزگارێ دھۆکێ: پیرۆزباھیێ ل ھەمی خەلکێ ھەرێما کوردستانێ دکەین
دھۆک-KDP.info-بیرەوەریا سەرھلدانا باژێڕێ دھۆکێ ل سالا ١٩٩١ ئەڤرۆ رۆژا سێشەمبی ١٥/٣/٢٠٢٢ ب ئەنجامدانا کوربەندەکی ژ لایێ پشکا مێژوویێ ل کۆلیژا زانستێن مرۆڤایەتی یا زانکۆیا دھۆک و رێڤەبەریا گشتی یا رەوشەنبیری و ھونەری ل پارێزگەھا دھۆکێ ڤە ب ئەنجامدانا چەندین پەنەلان ل ھۆلا کۆنفرانسان ل زانکۆیا ناڤھاتی ھاتە ساخکرن.
پ.د. عەلی تەتەر، پارێزگارێ دھۆکێ د پەیڤەکێ دا دیار کر کو ب ھەلکەفتا رۆژا سەرھەلدانا باژێرێ دھۆکێ سەرێ رێز و نەوازشێ بۆ ھەمی شەھیدێن کوردستانێ و ب تایبەتی بۆ شەھیدێن سەرھلدانا پیرۆز ل سالا ١٩٩١، ب ڤێ ھەلکەفتێ پیرۆزباھیێ ل ھەمی خەلکێ ھەرێما کوردستانێ و ب تایبەتی یێ پارێزگەھا دھۆکێ دکەین و گۆت: "خرابترین سالێن ژیانا کوردان پشتی ئوپەراسیۆنێن ئەنفالێ بوون و ئەو کەسێن زولما رژێما بەعسا ژناڤچووی یا عیراقێ نەدیتی چوجاران بەحسێ وان دەستکەفتێن ئەڤرۆ مللەتێ مە بدەستڤە ئیناین ناکەت و تێناگەھیت و نوزانن ئەو ئازادیا ئەڤرۆ ئەم تێدا دژین چیە، د مێژوویا کوردستانێ دا چو روودانێن مەزنتر ژ روودانا سەرھلدانێ نینە، ھەروەسا د مێژوویا کوردستانێ دا روودانەک ژ روودانا سەرھلدانێ خوەشتر و سەرفەرازتر و کاریگەرتر نینە، ژ بەر ڤێ چەندێ دڤێت سەرھلدان بمینیت ئێک ژ گرنگترین روودانێن مللەتێ کورد".
ھەژی گۆتنێ یە کو رۆژا د کوربەندێ بیرەوەریا سەرھلدانا باژێڕێ دھۆکێ ل سالا ١٩٩١ ێ دا د چەندین پەنەل و تەوەرێن جودا دا بەحسێ سەرھلدانا باژێرێ دھۆک و سێمێلێ و رۆژلێ پێشمەرگێن قەھرەمان د سەرھلدانێ دا ھاتەکرن.
رێوار محەمەد رەشید
