سەرۆکی حکومەتی هەرێمی کوردستان پێشوازی لە شاندێکی ئەمەریکی دەکات
ئه‌مڕۆ چوارشه‌ممه 9ی ئاداری 2022 مەسرور بارزانى سه‌رۆكى حکومەتی هه‌رێمى كوردستان، پێشوازى له شاندێكى ئه‌مه‌ریكى کرد به سه‌رۆكایه‌تى ماتیۆ توله‌ر باڵیۆزى ئه‌مه‌ریكا لە عێراق.
شاندەکە له جەنەراڵ جۆن برێنان فه‌رمانده‌ى هێزه‌كانى هاوپه‌یمانان له عیراق و سووریا، جینیفه‌ر گاڤیتۆ جێگری یاریدەدەرى وه‌زیرى ده‌ره‌وه بۆ كاروبارى عیراق و ئێران، ئیتان گۆڵدریچ جێگری یاریدەده‌رى وه‌زیرى ده‌ره‌وه بۆ كاروبارى ڕۆژهەڵاتی نزیک و وڵاتانی سوریا، لوبنان و ئوردن، ڕۆبەرت پاڵادینۆ كونسولى گشتیى ئه‌مه‌ریكا له هه‌ولێر و ژماره‌یه‌ك له به‌رپرسی دیکەی پێکهاتبوو.
له كۆبوونه‌وه‌کەدا، دوایین گۆڕانکاری و پێشهاته‌كانى پرۆسه‌ى سیاسى عێراق وبارودۆخى سوریا و ناوچەکە تاووتوێ کرا.
تەوەرێکی سەرەکی کۆبوونەوەکە تایبەت بوو بە بڕیاری دادگای باڵای فیدراڵی سەبارەت بە کەرتی نەوت و گازی هەرێمی کوردستان . سەرۆکی حکومەت، جەختی لە مافە دەستوورییەکانی هەرێمی کوردستان کردەوە و ئاماژەی بەوە دا کە ئەم بڕیارە، پێشێلکردنی مافە دەستوورییەکانی هەرێمی کوردستانە و خزمەت بە بەرژوەندیی هاووڵاتییان و سەقامیگریی و ئارامیی و ئاسایشی عێراق ناکات. سەرۆکی حکومەت، ئامادەیی هەرێمی کوردستانی بۆ چارەسەرکردنی کێشەکان لە ڕێگەی دانوستان و لە سەر بنەمای دەستوور دەربڕی.
شاندی ئەمەریکی پشتیوانی خۆیان بۆ بەردەوامی سەقامگیریی ئابووری و سیاسی هەرێمی کوردستان دووپات کردەوە.
هەڕەشە و مەترسییەکانی تیرۆریستانی داعش و گرنگیی بەردەوامبوونی پشتگیریکردنی پێشمەرگە، تەوەرێکی دیکەی گفتوگۆکانی كۆبوونەوەکە بوون .
