زانا مەلا خالید: ھیچ ئاستەنگێک لە بەردەم ھەڵبژاردندا نەماوە

هەولێر -KDP.info- سەرۆکی فراکسیۆنی پارتی لە پەرلەمانی کوردستان ڕەتی کردەوە ھیچ ئاستەنگێک لە بەردەم بەڕێوەچوونی ھەڵبژاردنەکانی ھەرێمی کوردستان ھەبێت و دەشڵێت، کار بۆ کاراکردنی کۆمسیۆنی سەربەخۆی ھەڵبژاردن و ڕاپرسی دەکرێت بۆ ئەوەی دەست بە ئامادەکاریی ھەڵبژاردن بکرێت.

زانا مەلا خالید، سەرۆکی فراکسیۆنی پارتی لە پەرلەمانی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند: "دوای دەرکردنی فەرمانی ھەرێمی بۆ ئەنجامدانی ھەڵبژاردنی پەرلەمانی کوردستان لە ١ی ئۆکتۆبەری ئەمساڵدا، فراکسیۆنی پارتی ھەڵوێستی خۆی دیار کردووە و ئێمە ھەموو ھەوڵێک دەدەین تاکوو ھەڵبژاردنێکی پاک و شەفاف لە کاتی دیاریکراوی خۆیدا بەڕێوە بچێت، چونکە ئەنجامدانی ھەڵبژاردن لە کاتی خۆیدا مافی یاساییی ھاووڵاتییانی ھەرێمی کوردستانە.''

سەرۆکی فراکسیۆنی پارتی دەڵێت: "ئێستا ھیچ بەربەستێک لەبەردەم بەڕێوەچوونی ھەڵبژاردنەکانی ھەرێمی کوردستاندا نەماوە و تەنیا کاراکردنەوەی کۆمسیۆن پێویستە، لەبەر ئەوەش کار بۆ ئەوە دەکرێت بەپێی یاسا، کۆمسیۆنی سەربەخۆی ھەڵبژاردنەکانی ھەرێمی کوردستان کارا بکرێتەوە و دەست بە ئامادەکاری بۆ ئەنجامدانی ھەڵبژاردن بکرێت.''

لەبارەی یاسای ھەمواری یاسای ھەڵبژاردنەوە زانا مەلا خالید ڕوونی کردەوە: "یاسای ھەڵبژاردنی ھەرێمی کوردستان پێویستی بە ھەموارکردنەوە نییە، بەڵام ئێمە ڕێگر نابین لە ھەموارکردنەوەی ئەگەر کات بەردەست بێت بۆ ھەموارەکە، چونکە ھەموارکردنەوەی یاسای ھەڵبژاردن پێویستی بە کاتی زیاترە.''

قائید میرۆ