کوربەندێ سالڤەگەڕا ٣٤ێ یا ئەنفالێ ل دھۆکێ ھاتە ئەنجامدان
دھۆک-KDP.info- کوربەندێ سالڤەگەڕا ٣٤ێ یا ئەنفالێ ب ناڤێ (ئەنفال و کەلھا نزارکێ د بیردانکا مە دا) ئەڤرۆ رۆژا چارشەمبی ٢٣/٢/٢٠٢٢ ژ لایێ سەنتەرێ ڤەکۆلینێن جینوسایدێ سەنتەرێ بێشکچی بۆ ڤەکۆلینێن مرۆڤایەتی و کۆلیژا زانستێن مرۆڤایەتی و پشکا سیاسەتا گشتی ل زانکۆیا دھۆک ب ھەماھەنگی دگەل رێڤەبەریا گشتی یا رەوشەنبیری و ھونەری ل پارێزگەھا دھۆکێ و رێکخراوا ٨٨ یا ناساندنا تاوانێن ئەنفالێ ل کەلھا نزارکێ ل باژێڕێ دھۆکێ ھاتە ئەنجامدان.
حەسەن فەتاح، پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو د ڤی کوربەندی دا چەندین کەسوکارێن قوربانیان و کەسێن بسپۆر بەحسێ گرنگیا کەلھا نزارکێ وەکو مۆزەخانا جینوسایدێ یا نشتیمانی و کەلھا نزارکێ دبیردانکا قوربانیێن ئەنفالێ دا کر و گۆت: "مەرەم ژ ئەنجامدانا ڤی کوربەندی گەھاندنا چەندین پەیامان بوو ئەو ژی ئەڤ کوربەندە ل جھەکی ھاتە ئەنجامدان کو سمبۆلا ئەنفالان بگشتی و بتایبەتی ئەنفالا سالا ١٩٨٨ یا بەھدینان بوو ئەو ژی کەلھا نزارکێ یە، مە دڤیا ڤێ چەندێ بینینە بیرا خەلکی ڤە کو ئەڤە دیرۆکا مللەتێ مە یێ کوردە".
ناڤھاتی ئاماژە دا وێ چەندێ کو ل سالا ٢٠١٠ بریار ھاتبوو دان کو کەلھا نزارکێ ببیتە مۆزەخانەکا جینوسایدێ نەبتنێ بۆ ئەنفالان ، بەلکو بۆ ھەر کۆمکۆژیەکا د راستا مللەتێ کورد دا ھاتیە ئەنجامدان و چەندین پێنگاڤ ژی بۆ ڤێ مەرەمێ ھاتبوونە ھاڤێتن ژ وان ژی ئەو خەلکێ د ناڤ کەلھێ دا ئاکنجی ھاتینە قەرەبووکرن و کەلھا ناڤھاتی ھاتیە پاقژکرن، ھەروەسا ژ لایێ ئەندازیاری و ھونەری ژی ڤە کارەکێ باش ل سەر ھاتیەکرن، بەلێ ژ بەر قەیرانا دارایی یا ل سالا ٢٠١٤ ب سەر ھەرێما کوردستانێ دا ھاتی ئەڤ پرۆژە مایە راوەستیایی و گۆت: "ب رێیا ڤی کوربەندی دووبارە مە پەیاما خوە گەھاندە حکومەتا ھەرێما کوردستانێ و ئیدارا خوەجھی یا پارێزگەھا دھۆکێ ھەکە شیانێن دارایی ل بەر دەست ھەبن یا گرنگە دووبارە دەست ب تمامکرنا ڤی پرۆژێ گرنگ بھێتەکرن".
رێوار محەمەد رەشید
