دھۆک.. ب کۆژمێ ٦٩ ملیار دیناران پرۆژە ھاتینە ئەنجامدان
دھۆک-KDP.info-رێڤەبەرێ گشتی یێ باژێرڤانیان ل پارێزگەھا دھۆکێ دیار کر کو د سالا ٢٠٢١ێ دا ب کۆژمێ ٦٩ ملیار دیناران پرۆژە ل سنوورێ پارێزگەھا دھۆکێ ھاتینە ئەنجامدان و د ھەمان سال دا ھەروەسا ٣٦٨ زێدەگاڤی ھاتینە راکرن.
ئەندازیار دیار بەحری رەسول، رێڤەبەرێ گشتیێ باژێرڤانیان ل پارێزگەھا دھۆکێ د کۆنگرەکێ رۆژنامەڤانی دا ئاشکرا کر کو د سالا بۆری یا ٢٠٢١ دا، ل سنوورێ رێڤەبەریا گشتیا باژێرڤانیان ٦٩ پرۆژە ب کۆژمێ ٢١ ملیار و ٧١٠ ملیۆن دیناران پرۆژە ھاتینە ئەنجامدان و ژ وان پرۆژەیان ژی ١٩ پرۆژە ب دووماھی ھاتینە و ٤٨ پرۆژە ھێشتا ل ژێر ئەنجامدانێ نە و گۆت: پتریا ڤان پرۆژەیان خزمەتگۆزاری و چێکرنا رێکانە.
زێدەتر گۆت: ژ سەرجەمێ وان پرۆژەیان ١٩ پرۆژە ب کۆژمێ نێزیکی ١٠ ملیار دیناران ل سەر بۆدجەیا تایبەت یا پارێزگەھا دھۆکێ ل سالا بۆری دا دەستبکارببوون و ژ وان پرۆژەیان ژی نەھـ پرۆژە ب داوی ھاتبوون، ٢٨ پرۆژە ل سەر بۆدجەیا گەشەپێدانا پارێزگەھا دھۆکێ ب کۆژمێ نەھـ ملیار دیناران دەستبکارببوون و ١٥ پرۆژە ل سەر داھاتێ باژێرڤانیان و سێ پرۆژە ل سەر بۆدجەیا حکوومەتا عیراقا فیدرال ب کۆژمێ ملیارەک و ٤٠٠ ملیۆن دیناران کو ل ناحیا فەیدیێ ھاتینە ئەنجامدان.
ناڤھاتی ئاماژە دا وێ چەندێ کو د سالا ٢٠٢١ دا ھەشت پرۆژە ب کۆژمێ دوو ملیار و ١٣٥ ملیۆن دیناران پرۆژە ژلایێ رێکخراوێن بیانی ڤە د کەرتێ ژینگەھێ دا ھاتینە ئەنجامدان، د ھەمان سال دا ب درێژاھیا ٦٧ کیلۆمەتران جادە ھاتینە قێرکرن، ب درێژاھیا ١٥ کیلۆمەتران جادە ھاتینە کۆنکریتکرن، ١٣ ھزار و ٢٩٥ گۆل و نەمان ھاتینە چاندن و گۆت: "د ھەمان سال دا ٣٢ زەڤیێن پێشەسازی ھاتینە تەرخانکرن، ١٢ سەرئێک زێدەکرن بۆ پرۆژێن مافێ بەرخۆری و ٣٩ سەرئێک زێدەکرن بۆ کرێدانا، ھەروەسا ٣٦٨ زێدەگاڤی ھاتینە راکرن. دیسان ٢١ پارچە ئەرد ھاتینە تەرخانکرن بۆ پرۆژەیێن وەبەرھێنانێ ل سەر رووبەرێ ٣٩٨ دونەمێن ئەردی، ھەروەسا ١٠٢٤ مۆلەت بۆ ئاڤاکرنا خانیێن نیستەجێ ھاتینە دان، ٧٠ مۆلەتێن بازرگانی و ب رێژەیا ٨% کەسکاتی ھاتیە چاندن و داھاتێ باژێرڤانیان ژی بۆ سالا ٢٠٢١ دگەھیتە دوو ملیار و ٤١٦ ملیۆن دیناران تاکو ٣٠/١١/٢٠٢١".
ناڤھاتی خویا کر کو ل سالا ٢٠٢١ دا حەفت سەرۆک باژێرڤانی ھاتینە گوھۆرین، ھەروەسا د ھەمان سال دا ب کۆژمێ ٢١ ملیار دیناران پرۆژە د وارێ ژینگەھێ دا ھاتینە ئەنجامدان، ھەروەسا ٢٩٤ ھزار و ٩٦٦ تەنێن گلێشی ھاتینە کۆمکرن و ڤەگوھاستن بۆ کارگەھا جوداکرنێ ل کواشێ و ئاکرێ و ھزار و ٨٥٥ لیترێن دژە ڤایرۆس ل سنوورێ رێڤەبەریا گشتی ھاتینە رەشاندن و گۆت: " نەھـ پرۆژە ل کۆمەلگەھا قەدش و شێلادزێ و دێرالوک و سەرسنکێ و چەمانکێ و کانی ماسێ ل سەر بۆدجەیا تایبەت یا پارێزگەھا دھۆکێ ب دووماھی ھاتینە و حەفت پرۆژە ژی ل فەیدیێ، مسێریک، بەردەرەش، تەناھی و سێ پرۆژە ل سێمێلێ ب دووماھی ھاتینە. ھەروەسا ٩٨ پرۆژەیێن بچووک ب کۆژمێ ٨٨٢ ملیۆن دیناران ل سەر پێشینەیا ھەیڤانە یا باژێرڤانیان ھاتینە ئەنجامدان".
ل دووماھیێ ژی رێڤەبەرێ گشتیێ باژێرڤانیان ل پارێزگەھا دھۆکێ دیار کر کو بۆ ئەڤ سالە یا ٢٠٢٢ ھژمارەکا پرۆژەیان پێشنیارکرینە، ژ وان ژی ٤٤ پرۆژە ب کۆژمێ ٢٨ ملیار دیناران بۆ وەزارەتا شارەوانی و گەشت و گۆزار ھاتیە داخوازکرن، ٢٢ پرۆژە ب کۆژمێ نێزیکی ھەشت ملیار دیناران بۆ حکوومەتا فیدرال ھاتینە پێشنیارکرن، ٤٢ پرۆژە ب کۆژمێ ١١ ملیار دیناران بۆ پارێزگەھا دھۆکێ ھاتینە پێشنیارکرن و سەرجەمێ پرۆژێن پێشنیارکری بۆ سالا ٢٠٢٢ دگەھیتە ١٠٨ پرۆژەیان ب کۆژمێ ٤٨ ملیار دیناران.
رێوار محەمەد رەشید
