وەلاتێ چیک کەلوپەلێن نۆشداری بۆ ساخلەمیا دھۆکێ دابینکرن

دھۆک-KDP.info- ب مەرەما پشتەڤانیێ ل کەرتێ ساخلەمیێ ل پارێزگەھا دھۆکێ ئەڤرۆ رۆژا چارشەمبی ٢/٢/٢٠٢٢ قۆنسلێ وەلاتێ چیک ل ھەرێما کوردستانێ کەلوپەلێن نۆشداری بۆ ساخلەمیا دھۆکێ دابینکرن

. د.ئەفراسیاب موسا، رێڤەبەرێ گشتی یێ ساخلەمیێ ل پارێزگەھا دھۆکێ د کۆنگرەکێ رۆژنامەڤانی دا ئاشکرا کر قۆنسلێ وەلاتێ چیک ئەڤرۆ چەندین کەلوپەلێن نۆشداری و تەختێن نەخۆشان پێشکێشی ساخلەمیا ئامێدیێ کرن، ھەروەسا د ھەمان دەم دا ژمارەکا پێدڤیێن ساخلەمیێ بۆ نەخۆشخانا ئازادی ژی ژ لایێ قۆنسلێ وەلاتێ ناڤھاتی ڤە ھاتنە دابینکرن و گۆت: "بەری نوکە ژی وەلاتێ چیک چەندین جاران ھاریکاریێن ساخلەمیێ پێشکێشی پارێزگەھا دھۆکێ کرینە".
ناڤھاتی ئاماژە دا وێ چەندێ کر" کو بەری نوکەژی وەلاتێ چیکی چەندین جاران ھاریکاریا کەرتێ ساخلەمی ل پارێزگەھا دھۆکێ کریە و ھژمارەک نۆشدار و کارمەندێن ساخلەمی بۆ مەشق و راھێنانێ چووینە وەلاتێ چیکێ بۆ وەرگرتنا ئەزموونا ساخلەمیا ئەڤی وەلاتی.
ژلایێ خۆڤەژی کارێل کورتانێک قۆنسلێ چیکێ ل ھەرێما کوردستانێ دیارکر" چەندین پێدڤیێن نۆشداری بۆ نەخۆشخانەیا ئازادی ل دھۆکێ ھاتینە دابینکرن، ب رێیا کۆمپانیەکا چیکی پێدڤیێن نۆشداری بۆ نەخۆشخانا ئامێدیێ ژی ھاتینە دابینکرن، ل داھاتی ژی دێ بەردەوامبین سەر ھاریکاریا پارێزگەھا دھۆکێ.
وارشین سەلمان قایمقامێ ئامێدیێ دداخویانیەکێ دا راگەھاند" ئەڤرۆ ھۆلا نەشتەرگەریێن دایکبوونێ ل نەخۆشخانا ئامێدیێ ھاتینە ڤەکرن،کو ھەموو کەلو پەلێن نەخۆشخانێ ھاتینە دابینکرن، ئەوژی ب ھاریکاریا قۆنسلخانا چیکێ ب ھەماھەنگی دگەل رێڤەبەرایەتیا گشتیا ساخلەمیا دھۆکێ، کو ئەم دخوازین وەلاتێ چیکێ بەردەوامبیت لسەر ھاریکاریا کەرتێ ساخلەمی ل دھۆکێ.
قائید میرۆ – رێوار محەمەد