ئەڤرۆ ٧٦ سالیا دامەزراندنا کۆمارا کوردستان ل دھۆکێ ھاتە ساخکرن
دھۆک –KDP.info- بیرەوەریا ٧٦ سالیا دامەزراندنا کۆمارا کوردستان ئەڤرۆ رۆژا ئێکشەمبی ٢٣/١/٢٠٢٢ ل دەمژێر ٤:٠٠ ئێڤاری ب ئەنجامدانا چەندین چالاکیان ژ لایێ مالا لاوان یا ئێکەتیا لاوێن دیموکراتا کوردستانێ ڤە ل ھۆلا سەنتەرێ پێشمەرگە یێ رەوشەنبیری ل دھۆکێ ھاتە ساخکرن.
__2022_01_23_h18m31s22__HK.jpg)
کاوار رەسۆل نێروەیی، بەرپرسێ مالا لاوان ل دھۆکێ بۆ ماڵپەرێ فەرمیێ پارتی دیموکراتی کوردستان دیار کر کو کۆمارا کوردستان ئیک ژ وێستگەھێن گەلەک گرنگێن مێژوویا بزاڤا رزگاریخوازا گەلێ کوردستانێ بوویە، ھەروەسا دەستکەفتێ دووێ یێ کوردستانیان بوویە ل سەر ھەر چار پارچێن کوردستانێ پشتی شۆرەشا (شێخ مەحمودێ حەفید) ل سالا ١٩١٩ ل سلێمانیێ، ژ بەر ڤێ چەندێ وان وەکو مالا لاوان ڤیا ڤێ بیرەوەریێ ب شێوەیەکێ ئەکادیمی ساخ بکەن و بێخنە ل بەر خامەیێ مامۆستا و سیاسەتمەدارێن بسپۆر.
__2022_01_23_h18m32s36__HK.jpg)
ناڤھاتی ئاماژە دا وێ چەندێ کو د چارچۆڤێ ساخکرنا ڤێ بیرەوەریێ دا ئەڤرۆ د پەنەلەکی دا (د.ھەوار نێروەیی) بەحسێ گۆتارا ناسیونالیزما کوردی د کۆمارا کوردستان دا کر، ھەروەسا (د.فەرھاد محەمەد ئەحمەد)ی ژی بەحسێ کارتێکرنا کۆمارا کوردستان ل سەر بزاڤ و شۆرەشێن کوردی کر و گۆت: "د ھەمان دەم دا پەرتووکا (پێشەوا قازی محەمەد و کۆمارا کوردستان) ھاتە ئیمزاکرن کو ژ وەشانێن مالا لاوانە و ژ لایێ لاوەکی ڤە ھاتیە بەرھەڤکرن، وەکو مالا لاوان ئەم پشتەڤانێن ھەمی لاواینە د ھەر بوارەکی دا بشێت خزمەتا تەخا لاوا و جڤاکی ب شێوەیەکێ گشتی بکەت".
رێوار محەمەد رەشید
