پرۆژێ ئێکێ یێ وەبەرھێنانێ ل زاخۆ کەفتە د بوارێ بجھئینانێ دا
دھۆک-KDP.info- د رێورەسمەکی دا ب ئامادەبوونا (د.محەمەد شوکری) سەرۆکێ دەستەیا گشتی یا وەبەرھێنانێ ل ھەرێما کوردستانێ و (گوھدار شێخۆ) سەرپەرشێ ئیدارەیا سەربەخۆ یا زاخۆ ئەڤرۆ رۆژا سێشەمبی ١٨/١/٢٠٢٢ بەرێ بنیاتی بۆ پرۆژێ ئێکێ یێ وەبەرھێنانێ ل زاخۆ ھاتە دانان.
گوھدار شێخۆ، سەرپەرشتێ ئیدارا سەربەخۆ یا زاخۆ بۆ ماڵپەرێ فەرمیێ پارتی دیموکراتی کوردستان دیار کر کو پشتی زاخۆ بوویە ئیدارەکا سەربەخۆ ئەڤرۆ بۆ جارا ئێکێ وان بەرێ بنیاتی بۆ ئۆتێلا (کینگ ریکسۆس) ل زاخۆ دانا کو ئەڤ پرۆژە دێ ژ لایێ وەبەرھێنەرەکی ڤە ھێتە بجھئینان و گۆت: "چێکرنا ڤی پرۆژەیێ گرنگ دێ بیتە دەرگەھەکێ باش بۆ وەبەرھێنەران کو پرۆژێن خوە ل ئیدارا سەربەخۆ یا زاخۆ ئەنجام بدەن و بێخنە د خزمەتا بەرژەوەندیا گشتی دا".
ناڤھاتی ئاماژە دا وێ چەندێ کو وان دگەل سەرۆکێ دەستەیا گشتی یا وەبەرھێنانێ ل ھەرێما کوردستانێژی ب درێژاھی بەحسێ بابەتێ گرنگیا پرۆسا گەشەیا وەبەرھێنانێ ل ھەرێما کوردستانێ بگشتی و بتایبەتی ل سنوورێ ئیدارا سەربەخۆ یا زاخۆ کریە و سەرۆکێ دەستەیا ناڤھاتی ژی سۆزدایە وان وەکو حکومەتا ھەرێما کوردستانێ و دەستەیا وەبەرھێنانێ دێ ھاریکار و پشتەڤانن بۆ ئەنجامدانا ھەر پرۆژەیەکێ کو دخزمەتکرنا خەلکێ سنوورێ ئیدارا سەربەخۆ یا زاخۆ دا بیت و دێ ھەمی ئاسانکاریان د چارچۆڤێ یاسایێ دا بۆ وەبەرھێنەران کەن.
رێوار محەمەد رەشید
