مۆلەتا پرۆژەکێ وەبەرھێنانێ ل دھۆکێ ھاتە ڤەکێشان
__2022_01_10_h13m56s38__RM.jpg)
دھۆک-KDP.info- رێڤەبەرێ گشتی یێ وەبەرھێنانێ ل پارێزگەھا دھۆکێ دیار کر کو ژ بەر پێنەگێریا وەبەرھێنەرەکی ب یاسا و رێنمایێن وەبەرھێنانێ مۆلەتا پرۆژەکێ وەبەرھێنانێ ل پارێزگەھا دھۆکێ ھاتە ڤەکێشان و بۆ تمامکرنێ ئەڤ پرۆژە دێ رادەستی وەبەرھێنەرەکێ دی ھێتەکرن.
کوردو ئیحسان، رێڤەبەرێ گشتی یێ وەبەرھێنانێ ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو ل ھەیاما بۆری مۆلەتا وەبەرھێنانێ بۆ چێکرنا پرۆژێ (بەرێ بھار یێ گەشتیاری) ل پارێزگەھا دھۆکێ ھاتبوو دەرکرن و ھەتا رادەیەکی کار ژی تێدا ھاتبووکرن و چەند پێکھاتەک ژ پرۆژەی ھاتبوونە ئاڤاکرن ژ وان ژی سێ خانیێن ئێک قات کو ھێشتا ھەیکەلن و چار خانیێن ئێک قات کو ھێشتا نەھاتینە تماکرن، ھەروەسا دیوارێ پێنج خانیان ھاتبوو دانان، بەلێ ژ بەر پێنەگێریا وەبەرھێنەرێ کار د بجھئینانا ڤی پرۆژەی دا دکر ب یاسا و رێنمایێن وەبەرھێنانێ مۆلەتا ڤی پرۆژەی ژێ ھاتە ڤەکێشان و ب رێیا بەلاڤکرنا دەرفەتا وەبەرھێنانێ ئەڤ پرۆژە دێ رادەستی وەبەرھێنەرەکێ دی ھێتەکرن بۆ وێ چەندێ ڤی پرۆژەی تمام بکەت.
ناڤھاتی ئاماژە دا وێ چەندێ کو پرۆژێ بەرێ بھار یێ گەشتیاری ل سەر رووبەرێ ١٠٠ ھزار مەترێن دوجا یێن ئەردی دێ ھێتە چێکرن و ٥٠ خانیێن گەشتیاری و خوارنگەھێن گوزاری و ھۆلا ئاھەنگا و کافێتریا و ھۆلا یاریێن ئەلکترۆنی و باخچان ب خوەڤە دگریت و گۆت: "د سالا ٢٠٢١ێ دا مۆلەتا وەبەرھێنانێ ب ١٦ پرۆژان د سەکتەرێن جودا جودا دا و ل دەڤەرێن جودا یێن پارێزگەھا دھۆکێ ھاتبوو دان کو سەرمایێ وان پرۆژان پتری ١٣٨ ملیۆن دۆلاران بوو".
رێوار محەمەد رەشید
