هەزار یه‌که‌ى نیشته‌جێبون له که‌لار دروست ده‌کرێت
کەلار-KDP.info- نزیکه‌ى هه‌زار یه‌که‌ى نیشته‌جێبون بۆ که‌مئه‌ندامان له شارى که‌لار دروست ده‌کرێت و له دواى ته‌واوبوونى ڕێکاره ئیداری و یاساییه‌کان، ده‌ست به جێبه‌جێکردنیان ده‌کرێت.
ده‌روون عومه‌ر، به‌ڕێوەبه‌رى گشتیى چاودێرى و گه‌شه‌پێدانى کۆمه‌ڵایه‌تیى گه‌رمیان، به ماڵپه‌ڕى فه‌رمیى پارتى دیموکراتى کوردستانى ڕاگه‌یاند: "پرۆژه‌یه‌کى نیشته‌جێوون بۆ که‌مئه‌ندامان و خاوه‌ن پێداویستى تایبه‌ت (کورته باڵاکان، نابینایان، تلاسیما) له سنوورى ئیداره‌ى گه‌رمیان، به دیاریکراوى له شارى که‌لار، دروست ده‌کرێت، خۆشبه‌ختانه ئێستا پرۆژه‌که ڕه‌زامه‌ندیى ده‌سته‌ى گشتیى وه‌به‌رهێنانى بۆ وه‌رگیراوه و له‌دواى ته‌وابوونى ڕێکاره یاسایى و ئیدارییه‌کان ده‌ست به جێبه‌جێکردنى پرۆژه‌که ده‌کرێت''.
گوتیشى: "پرۆژه‌که به‌گشتى 1000 یه‌که‌ى نیشته‌جێبون له‌خۆ ده‌گرێت، به شێوه‌ى قیستى درێژخایه‌ن و به‌بێ وه‌رگرتنى سوود به‌سه‌ر خاوه‌نپێداویستییه تایبه‌ته‌کاندا دابه‌ش ده‌کرێت، ئێستا به هاوکاریى ئیداره‌ى گه‌رمیان و به‌ڕێوەبه‌رایه‌تیى نه‌خشه‌دانانى گه‌رمیان سه‌رقاڵى دابینکردنى زه‌ویین بۆ پرۆژه‌که".
بەڕێوەبه‌رى گشتیى چاودێرى و گه‌شه‌پێدانى کۆمه‌ڵایه‌تیى گه‌رمیان ڕوونیشى کرده‌وه: "میکانزمى دابه‌شکردنى یه‌کەکانی نیشته‌جێبوون له‌سه‌ر بنه‌ماى دابه‌شکردنى فۆڕمى تایبه‌ت ده‌بێت که هه‌مووى به شێوه‌ى خاڵبه‌ندى دیاری کراوه بۆ ئه‌وه‌ى که‌سانى موسته‌حه‌ق و شایسته سوودمه‌ند بن، به دڵنیاییەوە ڕێگه به هیچ ده‌ستێوردانێک ناده‌ین له هه‌رلایه‌که‌وه بێت".
ئه‌رسه‌لان ئه‌حمه‌د
