لیژنا بەرھەنگاربوونا کۆرۆنایێ ل دھۆکێ کۆمبوو
دھۆک-KDP.info- لیژنا بەرھەنگاربوونا کۆرۆنایێ ل پارێزگەھا دھۆکێ ئەڤرۆ رۆژا چارشەمبی ٥/١/٢٠٢٢ کۆمبوونەک ب سەرپەرشیا (پ.د.عەلی تەتەر پارێزگارێ دھۆکێ ئەنجامدا و د کۆمبوونێ دا دووپاتی ل بجھئینانا وان بڕیاران ھاتەکرن یێن کو ژ لایێ لیژنا بلندا بەرھەنگاربوونا نەخۆشیا کۆرۆنایێ ل ھەرێما کوردستانێ ھاتینە دەرکرن کو وەکو خوە بھێنە بجھئینان.
پ.د.عەلی تەتەر، پارێزگارێ دھۆکێ د کۆنگرەکێ رۆژنامەڤانی دا دیار کر کو ھەموو قائیمقام و رێڤەبەرێن پەیوەندیدار ل سنوورێ پارێزگەھا دھۆکێ د ڤێ کۆمبوونێ دا ئامادەببوون گرنگرترین خالێن د ڤێ کۆمبوونێ دا دانوستاندن ل دۆر ھاتیەکرن سەبارەت فەرمانبەران ل رۆژا ٢٠/١/٢٠٢٢ ھەر فەرمانبەرەکێ فاکسین دژی ڤایرۆسێ کۆرۆنایێ وەرنەگرتبیت رێ پێ ناھێتەدان کو دەواما خوە یا فەرمی بکەت، ژ بلی ھەکە فەرمانبەرەکی پەسەندا رێڤەبەریا گشتی یا ساخلەمیا پارێزگەھا دھۆکێ ھەبیت کو ژ بەر ھندەک ئەگەران نەشێت ڤاکسینێ وەرگریت، ھەروەسا ل رۆژا ١/٢/٢٠٢٢ رێنما دێ ھێنە دەرکرن کو وەلاتی ژی نەشێن قەستا فەرمانگەھێن حکومەتێ بکەن ھەکە ڤاکسین وەرنەگرتبیت.
ناڤھاتی ئاماژە دا وێ چەندێ کو لیژنە ل سەر ئاستێ ھەمی قەزایێن پارێزگەھا دھۆکێ دووبارە دێ ئەکتیڤ بنەڤە بۆ دووپاتیکرنێ ل وەرگرتنا ڤاکسینی، ژ بەر کو مەترسیا کۆرۆنایێ یا بەردەوامە و ل ھندەک وەلاتان دووبارە پێلەکا دی یا سەرھەلدەت و رۆژانە ژی خەلکێ تووشی ڤی ڤایرۆسی دبیت و ھندەک ژ بەر ھەمان ئەگەر یێ وەغەرا دووماھیێ دکەن و گۆت: "گرتنا ھۆلێن بەھیان بۆ وێ چەندێ بۆ کو خەلک تێکەلی ھەڤدۆ نەبیت بۆ پاراستنا گیانێ وان ژ ڤایرۆسێ کۆرۆنایێ، بەلێ مخابن وەکو پێدڤی خەلکی پێگری پێ نەکر و ل جھێن بەرتەنگ تر بەھی ددانان، ژ بەر ڤێ چەندێ وەزارەتا ئەوقاف و کاروبارێن ئایینی یا حکومەتا ھەرێما کوردستانێ یا ھاتیە راسپاردن کو دگەل ئێکەتیا زانایێن ئایینی پێکڤە ب رووننە خوارێ بەرنامەکی بۆ رێکخستن و دانانا بەھیان بدانن".
پارێزگارێ دھۆکێ ئاشکرا کر کو دەمێ گەشتیار قەستا سنوورێ پارێزگەھا دھۆکێ دکەن پێدڤیە کارتا وەرگرتنا ڤاکسینی یان ژی پشکنینا کۆرۆنایێ دگەل دابیت و ٤٨ دەمژمێر ب سەر ڤە نەبووریبن و ھەلگرێ ڤایرۆسی نەبیت بەرۆڤاژی ب ھیچ شێوەیەکی رێ پێ ناھێتە دان بھێنە د ناڤ پارێ.گەھا دھۆکێ دا.
رێوار محەمەد رەشید
