عەدنان کەرکووکی: بە بڕیاری پارێزگاری سەپێندراوی کەرکووک تابلۆ کوردییەکانی کەرکووک لابراون

کەرکووک-KDP.info- لە شاری کەرکووک ھەموو ئەو تابلۆیانەی لەلایەن فەرمانگەکانی شارەکەوە بە زمانی کوردی دانرابوون، لەلایەن ئیدارەی شارەکەوە لابراون و گوتەبێژی ئەنجومەنی سەرکردایەتیی پارتییش لە کەرکووک دەڵێت، بڕیارەکە سیاسییە و پڕۆسەیەکی نوێی تەعریب دەستی پێ کردووە.

عەدنان کەرکووکی، گوتەبێژی ئەنجومەنی سەرکردایەتیی پارتی لە کەرکووک، بە ماڵپەڕی فەرمیی پارتی دیموکراتی کوردستانی ڕاگەیاند: "پڕۆسەیەکی نوێی تەعریب لە کەرکووک دەستی پێ کردووە و چەند ڕۆژێکە بە بڕیاری پارێزگاری سەپێندراوی کەرکووک ھەموو ئەو تابلۆیانەی ھاتوچۆی کەرکووک کە بۆ شارەکە دانرابوو، و بە زمانی کوردییش لەسەریان نووسرابوو، لابراون، ئەمەش ھەوڵێکی دیکەی بەعەرەبکردنی کەرکووکە لەلایەن پارێزگاری سەپێندراوی شارەکەوە.''

گوتەبێژی پارتی لە کەرکووک دەڵێت: "لابردنی تابلۆی زمانی کوردی پێچەوانەی یاسا و دەستووری عێراقە، چونکە زمانی کوردی، زمانی فەرمییە لە عێراق و ئەمە کاری پارێزگار نییە، بۆیە تەنیا دژایەتیی کورد و جێبەجێکردنی پیلانی تەعریبە لە کەرکووک''.

عەدنان کەرکووکی ئاماژەی بۆ ئەوەش کرد: "دانان و لابردنی تابلۆ پەیوەندیی بە شارەوانی و شارەوانییەکانی کەرکووکەوە ھەیە، بەڵام گومان بۆ ئێمە پەیدا بووە کە تا ئێستا شارەوانیی کەرکووک کە بەرپرسە لە دانانی تابلۆی شارەکە ھیچ ھەڵوێستێکی نەبووە لەسەر بڕیاری سیاسیی پارێزگاری سەپێندراو.''

 

قائید میرۆ