سێ رێڤەبەریێن نوی ل سنوورێ ئیدارا سەربەخۆ یا زاخۆ دێ ھێنە ڤەکرن
دھۆک-KDP.info- سەرپەرشتێ ئیدارا سەربەخۆ یا زاخۆ دیار کر کو بڕیارا ڤەکرنا سێ رێڤەبەریێن نوی ل سنوورێ ئیدارا سەربەخۆ یا زاخۆ ھاتە دەرکرن و ئەڤ رێڤەبەریە دێ خزمەتەکا باش و ژ ھەژی پێشکێشی خەلکێ دەڤەرێ کەن.
گوھدار شێخۆ، سەرپەرشتێ ئیدارا سەربەخۆ یا زاخۆ بۆ ماڵپەرێ فەرمیێ پارتی دیموکراتی کوردستان گۆت: "ژ پێخەمەت بەرژەوەندیا گشتی و پێشکێشکرنا خزمەتەکا زێدەتر بۆ خەلکێ دەڤەرێ و بلندکرنا ئاستێ کارگێری ل سنوورێ ئیدارا سەربەخۆ یا زاخۆ ل دووڤ داخۆازا مە ب فەرمانا وەزاری بڕیارا ئەنجومەنێ وەزیران سێ رێڤەبەریێن نوی دێ ل سنوورێ ئیدارا ناڤھاتی ھێنە ڤەکرن".
ناڤھاتی ئاماژە دا وێ چەندێ کو ژ وان رێڤەبەریێن بڕیار ل سەر ڤەکرنا وان ھاتیەدان (رێڤەبەریا چاککرن و پاراستنا ڕێک و بانان ل زاخۆ ) و ( رێڤەبەریا ئاڤەدانکرن و ئاکنجیکرنێ ل زاخۆ ) و ھەروەسا ( رێڤەبەرییا تاقیگەھا بیناسازی ل زاخۆ ).
رێوار محەمەد رەشید
