لیژنا کۆمکرنا ھاریکاریان بۆ زیانڤێکەفتیێن لەھیێن ھەولێرێ ل دیوانا پارێزگەھا دھۆکێ دەستبکاربوو
دھۆک-KDP.info- پشتی کۆمبوونەک دوھی رۆژا ئەیینی ١٧/١٢/٢٠٢١ ب سەرپەرشتیا (پ.د.عەلی تەتەر) پارێزگارێ دھۆکێ و بەرھەڤبوونا جێگرێ پارێزگارێ ناڤھاتی و سەرۆکێ ژوورا بازرگانی و پیشەسازیا دھۆکێ و سەرۆکێ ئێکەتیا بەلێندەرێن کوردستانێ تایێ دھۆک و رێڤەبەرا رێڤەبەریا کوچوکۆچبەران و بەرسڤدانا قەیرانان بۆ کۆمکرنا ھاریکاریێن دراڤی و پێدڤیێن بلەز بۆ لێقەومیێن لەھیێن پارێزگەھا ھەولێرێ ھاتیە ئەنجامدان، بڕیار ھاتەدان لیژنەک بۆ ڤێ مەرەمێ بھێتە پێکئینان و ئەڤرۆ رۆژا شەمبی ١٨/١٢/٢٠٢١ لیژنا کۆمکرنا ھاریکاریێن دراڤی بۆ زیانڤێکەفتیێن لەھیێن ھەولێرێ ب سەروکاتیا بەرێز (ماجد سەید سالح) جێگرێ پارێزگارێ دھۆکێ، ل دیوانا پارێزگەھا دھۆکێ دەستبکاربوو، بۆ دەمێ حەفتیەکێ لژنا ناڤبری دێ یا بەردەوام بیت بۆ وەرگرتنا ھاریکاریێن دراڤی و ھاریکاریێن کەلوپەلان ژی دێ ل رێڤەبەریا کوچوکوچبەران و بەرسڤدانا قەیرانان ل دھۆکێ ھێنە وەرگرتن.
پ.د.عەلی تەتەر پارێزگارێ دھۆکێ، د کۆنگرەکێ رۆژنامەڤانی دا ئاشکرا کر کو ھەولێر یا بتنێ نینە و ھەولێر یا مە ھەمیانە و ھەڤخەمی و ھەڤسۆزیا خۆ و ھەمی خەلکێ پارێزگەھا دھۆکێ بۆ خەلکێ ھەولێرا پایتەخت رادگەھینین و سەرەخوشیێ ئاراستەی کەسوکارێن قوربانیان دکەین و گۆت: " ھاریکاریێن خەلکێ ھەولێرێ چ جاران ژبیرا مە ناچن ب تایبەتی پشتی ئەنفالان ئەڤرۆ ل وان قەومیە ژ بەر ڤێ چەندێ فەرە ل سەر مە ھاریکاریان وان بکەین".
رێوار محەمەد رەشید
