ئەمڕۆ جەردەکە تەواو بێت دەست بە قەرەبوو کردنەوە دەکرێت
ھەولێر-KDP.info- گوتەبێژی دەزگای روانگە دەڵێت، بە ھاوکاریی دەزگای خێرخوازیی بارزانی و پارێزگای ھەولێر، دەستیان بە ھاوکاریکردنی ئەو ناوچانە کردووە، کە بە ھۆی لافاوەوە زیانیان بەرکەوتووە و، سەرەتاش شوێنەکانیان پاک دەکرێتەوە و دواتریش بەپێی زیانەکان قەرەبوو دەکرێنەوە.
ئاری ڕەسووڵ، بۆ ماڵپەڕی فەرمیی پارتی دیموکراتی کوردستان گوتی: "دوای ئەوەی سەرۆکی ھەرێمی کوردستان رەزامەندی دەربڕی بۆ ئەوەی ملیارێک دینار وەکو ھاوکاری بۆ ئەوانەی بە ھۆی لافاو زیانیان بەرکەوتووە خەرج بکرێت، لە ئەمڕۆ بەیانییەوە دەزگای روانگە و دەزگای خێرخوازیی بارزانی و پارێزگای ھەولێر دەستمان کردووە بە دابەشکردنی ھاوکارییەکان و، لە یەکەم ھەنگاویشدا خواردنی بەیانیمان بۆیان ئامادە کردووە، چونکە زۆرینەی ماڵەکان کەلوپەلیان نەماوە و ھەر سێ ژەم خواردنیان بۆ دابین دەکەین، کارەکەش بە ھاوبەشی دەزگای خێرخوازیی بارزانی دەکرێت، لە ھەمان کاتیشدا دەست بە پاککردنەوەی شوێنەکانیان دەکەین و بۆیان خاوێن دەکرێتەوە، بۆ ئەوەی دواتر قەرەبوو بکرێنەوە و ناو ماڵیان بۆ دابین بکرێت".
گوتەبێژی دەزگای روانگە گوتیشی: "ھەر خێزانێک بەپێی زیانەکان قەرەبوو دەکرێنەوە و ئامارەکەش پارێزگا ئامادەی دەکات، بۆیە ئەوەی تا ئێستا جەرد کراوە زیاتر لە ٨٠٠ خێزان زیانیان بەرکەوتووە، لە گەڕەکەکانی گردجووتیار ١٥٠خێزان و رۆشنبیری ئەوەی تائێستا جەرد کراوە ٧٨خێزانە و ھەندێکی ماوە و قوشتەپەش ١٦٠خێزانە و سەرکارێز ١٨٠خێزانە و ھیران ستی ٦٢خێزان و دارەتوو ١٦٠خێزانە و ھەندێکی دیکەش ماون، کە بڕیارە ئەمڕۆ جەردەکە تەواو بێت و دواتریش دەست بە قەرەبوو کردنەوە دەکەین".
ڕەسووڵ باسی لەوەش کرد: "دەزگای خێرخوازیی بارزانی لە دوێنێوە دەستیان بە ھاوکاری کردووە بۆ ئەو ناوچانەی زیانیان بەرکەوتووە و پارێزگا و شارەوانیش بە هەمان شێوە، بۆیە ئەمڕۆش پێکەوە ھاوکارییەکان دەکەین و شوێنی دیکەش ھاوکارییان کردووە و بەردەوامیشە".
لای خۆشیەوە، سەرۆکی شارەوانیی ھەولێر، عەبدولواحید ئەحمەد، بۆ ماڵپەڕی فەرمیی پارتی دیموکراتی کوردستان گوتی: "ھەڵمەتێکی فراوانمان دەست پێکردووە بۆ پاککردنەوەی ئەو ناوچانەی زیانیان بەرکەوتووە و ئێستا لە گردجووتیار و رۆشنبیری و مامزاوا و لە ھەموو شوێنەکان تیمەکانمان لە کاردان، بۆیە کاری ئێمە پاککردنەوەیە و ئەوانەی دیکەش زیانەکان دەنووسن و ئێمەش بە سەدان ئالیەتمان بردوون بۆ ناوچەکە، هەروەها ٨٠ تەنکەریشمان بردووە و ماڵەکان ھەمووی خاوێن دەکرێنەوە".
عەبدولواحید ڕوونیشی کردەوە، بە دەیان شۆفڵ و حەفارە و قەلاب کەندەکان خاوێن دەکەنەوە و فراوانیان دەکەن، بۆ ئەوەی لافاو دووبارە نەبێتەوە، ھۆکارەکەشی ئەوەیە بارانێکی زۆر باریوە، کە ٨٠ ملم لە ماوەی یەک سەعاتدا باریوە، کە ئەوەش رێژەیەکی یەکجار زۆرە لە ماوەیەکی کەمدا.
بڵند ئیبراھیم
