فەتحی محەمەد: ئەمساڵ ھاوردەکردنی ئۆتۆمبێل زیادی کردووە
هەولێر-KDP.info- بەگوێرەی ئامارێکی وەزارەتی بازرگانی و پیشەسازی، ھاوردەکردنی ئۆتۆمبێل بۆ ھەرێمی کوردستان زیادی کردووە و ڕاوێژکارێکی وەزارەتیش دەڵێت، ھاوردەکردنی ئۆتۆمبێل بەپێی مەرج و ڕێنمایییەکانی وەزارەتی ناوخۆیە.
فەتحی محەمەد، ڕاوێژکار لە وەزارەتی بازرگانی، بە ماڵپەڕی فەرمیی پارتی دیموکراتی کوردستانی ڕاگەیاند: "ئەمساڵ بەراورد بە ساڵی ڕابردوو ھاوردەکردنی ئۆتۆمبێل زیادی کردووە و تەنیا لە ماوەی ١١ مانگی ئەمساڵدا زیاتر لە سەد ھەزار ئۆتۆمبێل بە ھەموو جۆرەکانییەوە ھاوردەی ھەرێمی کوردستان کراون، ئەویش لەڕێگەی چوار دەروازەی سنووری و فەرمییەوە.
ڕاوێژکارەکەی وەزارەتی بازرگانی دەشڵێت: "ساڵی ڕابردوو لە ماوەی دوازدە مانگدا تەنیا ٩٠ ھەزار ئۆتۆمبێل ھاوردەی ھەرێمی کوردستان کرابوون و، بەپێی ئاماری وەزارەت، ئەمساڵ ھاوردەکردنی ئۆتۆمبێل زیادی کردووە.''
فەتحی محەمەد ئاماژەی بۆ ئەوەش کرد: "ھاوردەکردنی ئۆتۆمبێل بەپێی ئەو مەرج و ڕێنماییانەیە کە لەلایەن وەزارەتی ناوخۆوە دەرکراون و جگە لە ڕێگەی فەرمی ھاوردەکردنی ئۆتۆمبێل لە ھیچ ڕێگەیەکی دیکەی نافەرمی و قاچاغەوە ڕێگەپێدراو نییە.''
قائید میرۆ
