بەرێ بنیاتی بۆ سێ پرۆژێن نوی یێن ساخلەمیێ ل دھۆکێ ھاتە دانان
دھۆک-KDP.info- د رێورەسمەکی دا ب ئامادەبوونا (پ.د.عەلی تەتەر) پارێزگارێ دھۆکێ و قۆنسلێ وەلاتێ ئیتالیا ل ھەرێما کوردستانێ و رێکخراوێن ئیتالی ئەڤرۆ رۆژا ئێکشەمبی ١٢/١٢/٢٠٢١ پشکێن شیرەتکاری یێن نەخۆشخانا ئافرەت و زارۆکبوونێ ل دھۆکێ ھاتنە ڤەکرن و بەرێ بنیاتی بۆ سێ پرۆژێن نوو یێن ساخلەمیێ ھاتە دانان.
پ.د.عەلی تەتەر، پارێزگارێ دھۆکێ د کونگرەکێ رۆژنامەڤانی دا ئاشکرا کر کو د بەردەوامیا پرۆژێن خزمەتگۆزاری دا یێن کو ژ لایێ حکومەتا ھەرێما کوردستانێ ڤە دھێنە ئەنجامدان، ھەشت ملیار دینار بۆ ئەنجامدانا چەندین پرۆژێن کەرتێ ساخلەمیێ ل پارێزگەھا دھۆکێ ژ لایێ حکومەتا ھەرێمێ ڤە ھاتینە تەرخانکرن و گۆت: "ئەڤرۆ بەرێ بنیاتی بۆ ھەر ئێک ژ پشکا چاڤدێریا چڕ ل نەخۆشخانا ئازادی یا فێرکرنێ ل دھۆکێ و سەنتەرێ (گەلاڤێژ) یێ پەنجەشێرا زارۆیان د ناڤ نەخۆشخانا ھیڤی دا ل دھۆکێ و ئاڤاکرنا سەنتەرێ نەخۆشیێن پەنجەشێرێ و چاندنا مەژیێ ھەستی ھاتە دانان".
پارێزگارێ دھۆکێ ئاماژە دا وێ چەندێ کو ئەڤرۆ پشکێن شیرەتکاری ل نەخۆشخانا ئافرەت و زارۆکبوونێ ل دھۆکێ ب پشتەڤانیا رێکخراوێن وەلاتێ ئیتالیا ھاتنە ڤەکرن و گۆت: "پشکێن ناڤھاتی ل سپێدە و ئێڤاریان دێ خزمەتەکا مەزن پێشکێشی نەخۆشان کەت".
رێوار محەمەد رەشید
