ئەڤرۆ زانکۆیا دھۆک رێککەفتنەک دگەل بوردێ پزیشکی کوردستان ئیمزا کر

دھۆک-KDP.info- رێڤەبەرێ راگەھاندنێ ل زانکۆیا دھۆک ئاشکرا کر کو شاندەکێ بۆردێ کوردستان بۆ بسپۆریێن پزیشکی ئەڤرۆ رۆژا سێشەمبی ٧/١٢/٢٠٢١ سەرەدانا زانکۆیا دھۆک کر ب مەرەما ئیمزا کرنا لێکتێگەھشتنەکی د بوارێ رێکخستنا کاری و پتر ھەماھەنگیێ دبیاڤێ دابینکرنا بسپۆریێن پزیشکی یێن جودا دا.

بێوار موسا، رێڤەبەرێ راگەھاندنێ ل زانکۆیا دھۆک بۆ مالپەرێ فەرمیێ پارتی دیموکراتی کوردستان دیار کر کو د روونشتنەکێ دا ب ئامادەبوونا ھاریکارێن سەرۆکێ زانکۆیێ و راگرێن کۆلیژێن کۆما پزیشکی و ئەندامێن بۆردێ ناڤھاتی، دانوستاندن ل سەر چەند بابەتێن گرێدایی کارێ ھەڤپشک و ھەماھەنگیێ دناڤبەرا زانکۆیا دھۆک و بۆردێ کورردستان بۆ بسپۆریێن پزیشکی ھاتە کرن و گۆت: "مامۆستایێن کۆلیژا پزیشکی ل زانکۆیا دھۆک رۆلەکێ سەرەکی دیتیە د دامەزراندنا ڤی بۆردی دا".
ناڤھاتی ئاماژە دا وێ چەندێ کو  ل دووماھیا ڤێ روونشتنێ ژی لێکتێگەھشتنەک د ناڤبەرا زانکۆیا دھۆک و بۆردێ کوردستان بۆ بسپۆریێن پزیشکی، ژلایێ سەرۆکێ زانکۆیا دھۆک، د. داود سلیمان ئەتروشی، و ھەروەسا سەرۆکا بۆردی د. ئاریانا خالێ بەرزنجی ھاتە ئیمزاکرن ب مەرەما پتر ھەماھەنگیێ دبیاڤێ دابینکرنا بسپۆریێن پزیشکی دا.
رێوار محەمەد رەشید