٧٥ کۆمپانی و رێکخراو دێ دەلیڤێن کاری بۆ دەرچوو و قوتابیێن دھۆکێ پەیداکەن
پێشانگەھەک بۆ پەیداکرنا دەلیڤێن کاری دێ ل دھۆکێ ھێتە ڤەکرن
دھۆک-KDP.info- سەنتەرێ گەشەپێدان بۆ کاری ل زانکۆیا پۆلیتەکنیکی یا دھۆک ب ھەڤکاری دگەل رێکخراوا NRC یا نەرویژی دێ پێشانگەھەکێ ب پشکداریا ٧٥ کۆمپانی و رێکخراوان بۆ دەرچوو و قوتابیێن زانکۆ و پەیمانگەھێن دھۆکێ ل رۆژا پێنجشەمبی ٢/١٢/٢٠٢١ ل دەمژێر ١٠:٠٠ سپێدێ ل ئاڤاھیێ پەیمانگەھا تەکنیکی دھۆک ڤەکەن.
بێوار سلێمان، مامۆستایێ زانکۆیێ و رێڤەبەرێ سەنتەرێ گەشەپێدان بۆ کاری ل زانکۆیا پۆلیتەکنیکی یا دھۆک بۆ مالپەرێ فەرمیێ پارتی دیموکراتی کوردستان دیار کر کو ھەمی بەرھەڤی بۆ ڤەکرنا ڤێ پێشانگەھێ ھاتینەکرن و ھەماھەنگیەکا گەلەک باش ژ لایێ وان ڤە دگەل دامودەزگەھێن کەرتێ تایبەت ھاتیەکرن کو د ڤێ پێشانگەھێ دا پشکدارببن و گۆت: "ئەو کۆمپانی و رێکخراوێن دڤێ پێشانگەھێ دا د پشکدار ھەمی ئەون یێن کو دەلیڤێن کاری ل دەف وان ھەین، ژ بەر کو دەمێ بەرھەڤی بۆ پێشانگەھێ دھاتنەکرن مە فورمەک ئاراستەیی وان کۆمپانی و رێکخراوان کر یێن کو دێ پشکداریێ د پێشانگەھێ داکەن و وان د وێ فورمێ دا دیار کریە کو دەلیڤێن کاری یێن ل دەف وان ھەین، سەرەرایی ڤێ چەندێ دێ ژمارەکا باش یا دەلیڤێن راھێنانێ ژی د ڤێ پێشانگەھێ دا ھێنە پەیداکرن، ژ بەر کو گەلەک دەرچوو و قوتابی ھەنە دەلیڤێن کاری ل کەرتێ تایبەت ب دەست دکەڤن، بەلێ ب شێوەیێ پراکتیکی نوزانن وی کاری بکەن و شارەزایی تێدا نینە ژ بەر ڤێ چەندێ ئەڤ پێنگاڤە ژی دێ ھێتە ھاڤێتن فێری کاری ببن".
ناڤھاتی ئاماژە دا وێ چەندێ کو ھەمی قوتابی و دەرچوویێن زانکۆ و پەیمانگەھێن پارێزگەھا دھۆکێ مافێ ھەیی د ڤێ پێشانگەھێ دا ئامادەببن و گۆت: "پێشانگەە بۆ دەمێ رۆژەکێ ب پشکداریا ٧٥ کۆمپانی و رێکخراوێن ل سنوورێ پارێزگەھا دھۆکێ کار دکەن دێ یا بەردەوامبیت و ھەمی پێدڤیێن پێشانگەھێ بێ بەرامبەر ژ لایێ مە ڤە بۆ پشکداران ھاتینە دابینکرن و ل دووڤ وێ پلانا ژ لایێ مە ڤە ھاتیە دانان زێدەتری ٩٠ دەلیڤێن کاری دێ بۆ دەرچوو و قوتابیان ھێنە پەیداکرن".
رێوار محەمەد رەشید
