دەست ب نووژەنکرنا قشلا ئاکرێ ھاتەکرن
دھۆک-KDP.info- رێڤەبەرێ شینواران ل پارێزگەھا دھۆکێ ئاشکرا کر کو ل رۆژێن بۆری دەست ب نووژەنکرنا قشلا ئاکرێ ل سەر شێوازێ وێ یێ بەرێ ھاتەکرن و گۆت: "ل پاشەرۆژێ د پلانا مەدایە مۆزەخانەکا شینواری و کەلەپۆری د ناڤ ڤێ قشلێ دا دروست بکەین".
د.بێکەس بریفکانی، رێڤەبەرێ شینواران ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو ١٦٦ ملیۆن دینار ب رازەمەندیا وەزارەتا شارەوانی و گەشتوگۆزار یا حکومەتا ھەرێما کوردستانێ بۆ نووژەنکرنا قشلا ئاکرێ ھاتینە تارخانکرن و گۆت: "نوکە کار د نووژەنکرنا قشلا ناڤھاتی دا ل ژێر سەرپەرشتیا شینوارناس و ئەندازیارێن رێڤەبەریا شینواران ل دھۆکێ و ئاکرێ یێ بەردەوامە کو دێ ل سەر شێوازێ وێ یێ بەرێ یێ کەڤنار ھێتە نووژەنکرن و بیناسازیا وێ ژی دێ ھێتە پاراستن".
ناڤھاتی ئاماژە دا وێ چەندێ کو ئێتوینا کسلێ ل دەڤەرا ئامێدیێ دھێتە ئامادەکرن و سۆتن، کورکا ئێتوینا کسلێ دوو مەتران دھێتە کولان و بەرەکێ تایبەت دھێتە بکارئینان کو پتری ٤٠ دەمژمێران دھێتە سۆتن و دووڤ دا بۆ دەمێ ١٠ ھەتا ١٥ رۆژان دھێتە سارکرن و ئامادە دبیت بۆ بکارئینانێ و گۆت: "ھەکە رەوشا کەشوھەوا یا گونجایی بیت ل دەمەکێ نێزیکێ دێ نووژەنکرنا قشلا ئاکرێ ب دووماھی ھێت".
رێڤەبەرێ شینواران ل پارێزگەھا دھۆکێ خویا کر کو ئوڤ قشلا نوکە دھێتە نووژەنکرن وەکو سومبۆلا ئاکرێ دھێتە دیارکرن و ئەڤ پارێ نوکە ھاتیە تەرخانکرن تێرا وێ پلانێ ھەمیێ ناکەت یا کو بۆ پشتی قووناغا نووژەنکرنێ دھێتە بجھئینان، ژ بەر کو د پلانا وان دایە مۆزەخانەکا شینواری و کەلەپۆری د ناڤ ڤێ قشلێ دا دروست بکەن و گۆت: "ل سەر دەمەکی ھەمی رێڤەبەریێن میری یێن ئاکرێ د ناڤ ڤێ قشلێ دابوون ژ بەر ڤێ چەندێ ھەکە د شیان دابوو دێ ژوورا قایمقامی ل سەر شێوازێ وێ یێ بەرێ چێکەین، ھەروەسا پەیکەرەکی بۆ قایمقامێ ئێکێ یێ ئاکرێ د ناڤ ھەمان ژوور دا دروست کەین بۆ وێ چەندێ ژ لایێ گەشتوگۆزارێ ژی ڤە مفا ژێ بھێتە وەرگرتن".
رێوار محەمەد رەشید
