كێشەی ٢٤٢٤پێشمەرگە چارەسه‌ر كرا و كێشەی سەدان بەڕێوەبەری گشتیش ماوە
ھەولێر-KDP.info- بەڕێوەبەی گشتیی خانەنشینیی ھەرێمی كوردستان رایگەیاند، تا ئێستا لە پلە باڵاكان كێشەی سەدان بەڕێوەبەری گشتی ماوە كە سەرقاڵی چارەكردنیانن. دەشڵێ، كێشەی ٢ هەزار و٤٢٤ پێشمەرگەش چارە كراوە و دۆسیەكانیان بۆ وەزارەتی پێشمەرگە گەڕاوەتەوە، كە بە پلەی باڵا خانەنشین كرابوون.
حازم ئیسماعیل، بۆ ماڵپەڕی فەرمیی پارتی دیموكراتی كوردستان گوتی: "پرۆسەی چاكسازی لە خانەنشینیی ھەرێمی كوردستان ھەر ماوە و لیژنەیەك دروست كراوە بۆ ئەو بەڕێوەبەرە گشتیانەی كە خانەنشین كراون و كێشە لە دۆسیەكانیاندا ھەیە بۆ ئەوەی چارەسەری بكەن، چونكە پلەی تایبەت تەواو بووە و تەنھا بەڕێوەبەری گشتی ماوە، لەبەر ئەوەی خەڵكێك بەڕێوەبەری گشتی نەبووە و بە بەڕێوبەر خانەنشین كراوە، كە بەسەدان كەس دەبن".
ئیسماعیل گوتیشی: "لە ئێستادا سەرقاڵی چارەكردنی كێشەكانی ئەوانین و ھێشتا تەواو نەبووە، بەڵام مووچەیان ھەر پێدەدرێت تا كێشەكانیان چارە دەكرێت و ئەوەی كەموكوڕیی ھەیە، پێویستە چاەسەری بكات و ئەوەی كێشەشی نییە، بەپێی یاسا مووچە وەردەگرێت، بەڵام ئەوەی سلكی مەدەنی كێشەیان نییە و پێویستی بەپێداچوونەوە نییە".
ناوبراو باسی لەوەش كرد، چاكسازی لەوانەشدا كراوە كە پێشمەرگە بوونە و بە پلەی تایبەت خانەنشین كرابوون، كە دوو ھەزار و٤٢٤ كەس بوون و كۆتایی بە كارەكانیان ھاتووە، ئێستاش گەڕاونەتەوە بۆ وەزارەتی پێشمەرگە و لە بانكەكان مووچەی خۆیان وەرەدەگرن" .
بڵند ئیبراھیم
