ژمارەیەک لیژنەی پەرلەمان بەدواداچوون بۆ سکاڵای هاووڵاتییان دەکەن
هەولێر -KDP.info- پەرلەمانی کوردستان بەدواداچوون بۆ سکاڵای هاووڵاتییان دەکات و ئەندامێکی لیژنەی دەستپاکییش دەڵێت، لەڕێگەی چەند لیژنەیەکەوە بەدواداچوون بۆ سکاڵای هاووڵاتییان دەکەن.
لەیلا عەبدولجەبار، ئەندامی لیژنەی دەستپاکی لە پەرلەمانی کوردستان بە ماڵپەڕی فەرمیی پارتی دیموکراتی کوردستانی ڕاگەیاند: "ڕۆژانە هاووڵاتییان سکاڵای خۆیان دەگەیەننە پەرلەمانی کوردستان و بەبێ جیاوازی سکاڵای هەموو کەسێک وەردەگیرێت و بە یەک چاو سەیری سکاڵاکان دەکەین، دوای گەیشتی هەر سکاڵایەک یەکسەر لیژنەی دەستپاکی بەڵگە لەسەر ئەو کەیسە کۆ دەکاتەوە و ئەگەر سکاڵاکە بنەمای هەبێت و بەڵگەی هەبێت کاری لەسەر دەکرێت.''
ئەندامەکەی لیژنەی دەستپاکی گوتیشی: "لیژنەی دەستپاکی بڕیاری داوە ژمارەیەک لیژنە بۆ یەکلاکردنەوە و بەدواداچوون بۆ سکاڵای هاووڵاتییان دیاری دەکەین.''
لەیلا عەبدولجەبار ڕوونی کردەوە: "هەموو سکاڵایەک دوای دڵنیابوون ڕەوانەی دەستەی دەستپاکی دەکرێت و بە ڕاپۆرتیش بەرز دەکرێتەوە، تا ئێستا ژمارەیەکی بەرچاوی سکلامان ناردووەتە دەستە و کاری لەسەر کراوە و دادگای دەستەی دەستپاکییش بڕیاری لەسەر داوە.''
قائید میرۆ
