مەکتەبی سیاسی پارتی بۆ حزبی شیوعی: سەرکەوتنی کۆنگرەی حەوتەمتان لێ پیرۆز دەکەین
ھەولێر-KDP.info- مەکتەبی سیاسی پارتی دیموکراتی کوردستان، بەبۆنەی سەرکەوتنی (٧)ەمین کۆنگرەی حزبی شیوعی کوردستان گەرمترین پیرۆزبایی ئاراستەی دكتۆر کاوە مەحموود سکرتێری کۆمیتەی ناوەندی حزبی شیوعی کوردستان و ئەندامانی کۆمیتەی ناوەندی حزبی شیوعی کوردستان ده‌كات.
دەقی پەیامی مەکتەبی سیاسی پارتی دیموکراتی کوردستان:
پەیامی پیرۆزبایی مەکتەبی سیاسی پارتی دیموکراتی کوردستان، بەبۆنەی سەرکەوتنی (٧)مین کۆنگرەی حزبی شیوعی کوردستان
بەڕێز/د. کاوە مەحمود سکرتێری کۆمیتەی ناوەندی حزبی شیوعی کوردستان
بەڕێزان/ ئەندامانی کۆمیتەی ناوەندی حزبی شیوعی کوردستان
بەبۆنەی سەرکەوتنی (٧)ەمین کۆنگرەی حزبی شیوعی کوردستان گەرمترین پیرۆزبایی لە ئێوەی بەڕێز و ئەندامان و لایەنگرانی حزبەکەتان دەکەین و، ئومێدەوارین بەستنی کۆنگرەتان ھەنگاوێکی دیکە بێت بەرەو پێشکەوتن و سەرکەوتنی زیاتر لە پلان و بەرنامەی حزبە تێکۆشەرەکەتان لەپێناو بەدیھاتنی گشت ئامانجە رەواکانی گەلی کوردستان.
جارێکی دیکە سەرکەوتنی کۆنگرەی حەوتەمتان لێ پیرۆز دەکەین و، جەخت دەکەینەوە لەسەر ھەماھەنگی و دۆستایەتی بەھێز و لەمێژینە و رەگداکوتاوی نێوانمان و سووربوون لەسەر پتەوکردنی پرەنسیپە راست و دروستەکانی خەبات و تێکۆشانی مەدەنیانە و دیموکراسیانە و بەدیھێنانی ئامانجە ھاوبەشەکانمان.
مەکتەبی سیاسی پارتی دیموکراتی کوردستان
٥ـی ١١ـی ٢٠٢١
