ئەڤرۆ کۆنگرێ ئێکێ یێ تایبەت ب نەخۆشیێن دلی ڤە دێ ل دھۆکێ دەست پێ کەت
دھۆک -KDP.info- کۆنگرێ ئێکێ یێ تایبەت ب نەخۆشیێن دلی و رھێن خوینێ ڤە ل سەر ئاستێ عیراقێ و ھەرێما کوردستانێ ئەڤرۆ رۆژا چارشەمبی ٢٧/١٠/٢٠٢١ ل دەمژێر ٧:٠٠ ئێڤاری دێ ل ھۆلا کۆنفرانسان ل زانکۆیا دھۆک دەست پێ کەت و دێ بۆ دەمێ سێ رۆژان یێ بەردەوام بیت.
د.شەوکەت سالح میرۆ، نۆشدارێ نەخۆشیێن دلی و رێکخەرێ ڤی کۆنگرەی بۆ مالپەرێ فەرمیێ پارتی دیموکراتی کوردستان ئاشکرا کر کو بۆ جارا ئێکێ یە کۆنگرەکێ ب ڤی شێوەی بۆ نۆشدارێن دلی ل سەر ئاستێ پارێزگەھێن ھەرێما کوردستانێ دھێتە ئەنجامدان و گۆت: "د رۆژێن کۆنگرەی دا دێ دانوستاندن ل سەر چەندین ڤەکۆلینێن تایبەت ب نەخۆشیێن دلی ڤە ھێتەکرن، ھەروەسا دێ بەحس ل چەندین بابەتێن گرێدایی نشتەرگەریێن دلی ژی ھێتەکرن و د ھەمان دەم دا چار نشتەرگەریێن دلی یێن سەرنجراکێش یێن نوی کو ل سەر ئاستێ جیھانێ دھێنە ئەنجامدان دێ ل سەنتەرێ دلی ل دھۆکێ ھێنەکرن و بشێوەیەکێ ئێکسەر دێ ل جھێ کۆنگرەی ھێنە نیشادان و دێ دانوستاندن ل دۆر وان نشتەرگەریان ژ لایێ نۆشدارێن ئامادەبووی ڤە ھێتەکرن".
ناڤھاتی ئاماژە دا وێ چەندێ کو د ڤی کۆنگرەی دا نۆشدارێن دلی دێ ژ ھەرێما کوردستانێ و عیراقێ و چەندین وەلاتێن دەوروبەرێن ئامادەبن، ھەروەسا ھندەک نۆشدارێن دلی ژ وەلاتێ ئەمریکا ژی دێ ب شێوەیێ ئۆنلاین پشکداریێ د ڤی کۆنگرەی دا کەن.
رێوار محەمەد رەشید
