رۆژا جیھانیا کورتەبالایان جودا ژ سالێن بۆری ل دھۆکێ ھاتە ساخکرن
دھۆک-Kdp.info- سەرۆکێ کۆمەلا کورتەبالایان تایێ دھۆکێ ئاشکرا کر کو ب ھەلکەفتا ٢٥/١٠ رۆژا جیھانیا کورتەبالایان ئەو دخوازیت جھێن پەیوەندیدار پتر خوە ل کورتەبالایان بکەنە خودان و دەرفەتێن کاری بۆ وان پەیدا بکەن.
وەحید سەعید چیچو، سەرۆکێ کۆمەلا کورتەبالایان تایێ دھۆکێ بۆ مالپەرێ فەرمیێ پارتی دیموکراتی کوردستان گۆت: "ب ھەلکەفتا ٢٥/١٠ رۆژا جیھانیا کورتەبالایان پیرۆزباھیێ ل ھەمی کۆرتەبالایان دکەم بتایبەتی یێن ھەرێما کوردستانێ و پارێزگەھا دھۆکێ، کورتەبالا کەسێن خودان شیان و پر بزاڤن د ھەمی بوارێن ژیانێ دا ژ بەر ڤێ چەندێ د ڤێ ھەلکەفتێ دا داخواز و گازیا خوە دگەھینینە جھێن پەیوەندیدار و ھەمی خودان کار و بازرگانان کو د ھاریکار و پشتەڤان بن دگەل ڤێ تەخا گرنگ یا جڤاکی و د پالپشت بن ژپێخەمەت پاراستنا ماف و ئەرکێن وان و دەرفەتێن کاری بۆ وان بھێنە پەیداکرن".
ناڤھاتی ئاماژە دا وێ چەندێ کو نوکە کۆمەلا کورتەبالایان تایێ دھۆکێ ٢٢٠ ئەندام ھەنە و گۆت: "سالانە کۆمەلا مە چەندین کار و بزاڤ و چالاکی ب ھەلکەفتا ٢٥/١٠ رۆژا جیھانیا کورتەبالایان ئەنجام ددان، بەلێ ئەڤ سالە ژ بەر گرتنەبەرا رێکارێن ساخلەمیێ بۆ خوەپاراستن ژ ڤایرۆسێ کۆرۆنایێ مە ئەڤ رۆژا جودا ژ سالێن بۆری ساخکر و بتنێ مە پەیاما خوە گەھاندە جھێن پەیوەندیدار".
رێوار محەمەد رەشید
