رێژا دەنگدانا تایبەت ل پارێزگەھا دھۆکێ ٨٨% بوو و سکالا نەھاتنە تۆمارکرن
دھۆک-KDP.info- بەرپرسێ ئۆفیسا دھۆک یا کۆمسیۆنا بلندا سەربەخۆ یا ھەلبژارتنێن عیراقێ ئاشکرا کر کو رێژا پشکداریێ ل دەنگدانا تایبەت یا ھەلبژارتنێن پێشوەخت یێن جڤاتا نوونەرێن عیراقێ ل پارێزگەھا دھۆکێ ٨٨% بوو و دەنگدانا ئاواران یێن د ناڤ کەمپان دا ٦٢% بوو و ئاوارێن ژ دەرڤەی کەمپان ٣٦% بوو.
خالد عەباس، بەرپرسێ ئۆفیسا دھۆک یا کۆمسیۆنا بلندا سەربەخۆ یا ھەلبژارتنێن عیراقێ ئاشکرا کر کو ئەڤرۆ دەنگدانا تایبەت و یا ئاواران بۆ ھەلبژارتنێن پێشوەخت یێن جڤاتا نوونەرێن عیراقێ ل پارێزگەھا دھۆکێ ھاتە ئەنجامدان و ئەڤ پرۆسە ب شێوەیەکێ گەلەک باش و سەرکەفتیانە ھاتە ئەنجامدان و گۆت: "رێژا پشکداریکرنێ د دەنگدانا تایبەت دا ل پارێزگەھا دھۆکێ ٨٨% بوو کو ٤٤ ھزار و ٨٢٣ دەنگدەران دەنگێ خوە ل پارێزگەھا دھۆکێ دا کو پتریا وان پێشمەرگێن قەھرەمان و ھێزێن ئێمناھیێ بوون کو دەنگێ خوە ل سەر ٣١ بنگەھێن دەنگدانێ داین، ھەروەسا رێژا پشکداریێ د ناڤ کەمپان دا ٦٢% بوو، ژ سەرجەمێ ٥٢ ھزار و ٢٦٠ دەنگدەران ٣٢ ھزار و ٤٨٧ دەنگدەران دەنگێ خوە دا ژ دەرڤەی کەمپان ژی ٣٦% کەسان دەنگێ خوە دا".
ناڤھاتی گۆت: "ل رۆژا ١٠/١٠/٢٠٢١ مە ژڤانە پرۆسا دەنگدانا گشتی بۆ ھەلبژارتنێن پێشوەخت یێن جڤاتا نوونەرێن عیراقێ ل سەرانسەری عیراقێ و ھەرێما کوردستانێ بھێتە ئەنجامدان بۆ ڤێ مەرەمێ ژی ھەمی کەرەستێن پێدڤی و ئامیرە یێن بۆ بنگەھێن دەنگدانێ ھاتینە دابینکرن کو ٢٦٤ بنگەھان ل پارێزگەھا دھۆکێ ب خوەڤە دگریت".
رێوار محەمەد رەشید
