ھونەرمەندێن (دھۆک – زاخۆ) دێ دەنگێ خوە دەنە بەربژارێن پارتی

دھۆک-KDP.info- ھونەرمەندێن باژێرێ دھۆکێ و ئیدارا سەربخۆیا زاخۆ سۆزدایە ل ھەلبژارتنێن جڤاتا نوونەرێن عیراقێ یێن کو ژڤانە ل رۆژا ١٠/١٠/٢٠٢١ بھێنە ئەنجامدان دەنگێ خوە بدەنە بەربژارێن پارتی دیموکراتی کوردستان.
ھونەرمەندێ ناڤدارێ باژێرێ دھۆکێ (محسن بەندی) بۆ مالپەرێ فەرمیێ پارتی دیموکراتی کوردستان دیار کر کو ژ پارتی دیموکراتی کوردستان زێدەتر وی چوجاران گوە لێ نەبوویە کەسێ دی بەرەڤانی ژ مللەتێ کورد و پاراستنا ئاخا کوردستانێ کری و ب خەبات و دیرۆکا پارتی یێ داخبارە، ژ بەر ڤێ چەندێ وی ژی بڕیاردایە بەردەوامیێ بدەتە رێبازا باب و باپیرێن خوە ل رۆژا ھەلبژارتنان دگەل ئەندامێن خێزانا خوە بەرەف سندوقێن دەنگدانێ ڤە بچن و دەنگێ خوە بدەنە بەربژارێن پارتی دیموکراتی کوردستان و گۆت: "پارتی خزمەتەکا مەزن بۆ تەخا ھونەرمەندان کریە و ھەتا نوکە ژی ل سەر وێ خزمەتێ یا بەردەوامە و دێ یا بەردەوام ژی بیت".
ھونەرمەند عەدنان سالح زاخۆیی، بۆ مالپەرێ فەرمیێ پارتی دیموکراتی کوردستان ئاشکرا کر کو ھەر دەمێ پارتی دیموکراتی کوردستان یا بھێز کوردستان ژی بھێز دکەڤیت، ژ بەر کو پارتی چارەنڤیسێ مللەتێ کوردە ل رۆژا ھەلبژارتنێن جڤاتا نوونەرێن عیراقێ وان وەکو خێزان بڕیاردایە دەنگێ خوە بدەنە بەربژارێن پارتی و گۆت: "ئەز باوەرم پشتی روودانێن ١٦ ئوکتۆبەرێ ھەر دەمێ ھەلبژارتن بھێنە ئەنجامدان دێ کورسیێن پارتی ل جڤاتا نوونەرێن عیراقێ و پەرلەمانێ کوردستانێ ژی پتر لێ ھێن و پارتی دێ بھێزتر بیت". 
ژ ئالیێ خوە ڤە ھونەرمەندێ باژێرێ دھۆکێ خورشید نێروەی، بۆ مالپەرێ فەرمیێ پارتی دیموکراتی کوردستان گۆت: "ل رۆژا ھەلبژارتنێن جڤاتا نوونەرێن عیراقێ ئەز و مالباتا خوە دێ دەنگێ خوە دەینە بەربژارێن پارتی دیموکراتی کوردستان، چونکو پارتی د دیرۆکا کوردان دا گەلەک بەرخودان و خەبات کریە و پارتی ھێزە و خودان شەھید و بەرخودان و سەروەریەکا مەزنە و پارتی نەبتنێ بۆ حزبا خوە خەبات کریە، بەلکو پارتی بۆ تەڤایا گەلێ کورد خەبات کریە ژ پێخەمەت ب دەستڤەئینانا ئارمانجێن نەتەوەیی و کوردتانەکا بھێز".
رێوار محەمەد رەشید