پێشانگەھەکا گەشتیاری یا نێڤدەولەتی دێ ل دھۆکێ ھێتە ڤەکرن

دھۆک-KDP.info- رێڤەبەرێ گشتی یێ گەشتوگۆزارێ ل پارێزگەھا دھۆکێ دیار کر کو ب ھەلکەفتا ٢٧/٩ رۆژا جیھانی یا گەشتوگۆزارێ رێڤەبەریا گشتی یا گەشتوگۆزارێ ل پارێزگەھا دھۆکێ ب ھەماھەنگی دگەل کەرتێ تایبەت دێ پێشانگەھا گەشتیاری یا نێڤدەولەتی یا ئێکێ - دھۆک ل رۆژێن ٢٧ ھەتا ٢٠٢١/٩/٢٩ ل پارکا نەورۆز یا د ناڤ سەنتەرێ باژێرێ دھۆکێ دا ڤەکەت.

پ.د.خەیری عەلی ئوسۆ، رێڤەبەرێ گشتی یێ گەشتوگۆزارێ ل پارێزگەھا دھۆکێ بۆ ماڵپەرێ فەرمیێ پارتی دیموکراتی کوردستان دیار کر کو ب مەرەما پێشڤەبرنا کەرتێ گەشتوگۆزارێ ل ھەرێما کوردستانێ ب گشتی و پارێزگەھا دھۆکێ ب تایبەتی سوبەھی دێ پێشانگەھا گەشتیاری یا نێڤدەولەتی یا ئێکێ - دھۆک ب پشکداریا چەندین بنگەھێن گەشتیاری یێن ھەرێما کوردستانێ و کومپانیێن گەشتیاری یێن وەلاتێن تورکیا و عیراقێ ھێتە ڤەکرن و گۆت: "دڤێ پێشانگەھێ دا پشتی چەندین پەیڤ دھێنە خواندن دێ فلمەکێ دیکومێنتاری ل دۆر جھێن گەشتیاری یێن ھەرێما کوردستانێ ھێتە نیشادان و تابلۆیا پێکڤەژیانێ ژ لایێ تیپا دھۆک یا ھونەرێ مللی ڤە دێ ھێتە پێشکێشکرن و دووڤ دا چەندین یاریێن ئاگری دێ ھێنە ھاڤێتن و چەندین ستران ژ لایێ چەندین ھونەرمەندێن بەرنیاس ڤە ھێنە گۆتن".
ناڤھاتی ئاماژە دا وێ چەندێ کو د ھەمان پێشانگەھـ دا دێ دو پەنەلێن جودا ب پشکداریا چەندین کەسێن بسپۆر ل دۆر گرنگیا کەرتێ گەشتوگۆزارێ ل ھەرێما کوردستانێ ھێنە پێشکێشکرن، ھەروەسا چەندین کۆمبوون دێ دگەل کۆمپانیێن گەشتیاری یێن وەلاتێ تورکیا ھێنە ئەنجامدان و گۆت: "د ڤێ پێشانگەھێ دا جھەکێ تایبەت بۆ ئیمزاکرنا گرێبەستان دناڤبەرا کۆمپانیان دا ھاتیە دەستنیشانکرن".

رێوار محەمەد رەشید