ئەڤین سەلیم مزیری: مێژوو ل سەر خۆڕاگریا پارتی دیدەڤانە

دھۆک-KDP.info-  بەربژارا ژمارە (٢٥) یا پارتی دیموکراتی کوردستان ل بازنێ (١) (دھۆک – ئامێدیێ) دیار کر کو، پارتی حزبا دەستھەلاتدارە ل سەر ئاستێ عیراقێ و ھەرێما کوردستانێ و مێژوو دیدەڤانە ل سەر خۆڕاگریا پارتی، ژ بەر کو پارتی قوتابخانا کوردایەتی و نەتەوەیی و ڤەرێژا وێ باوەری ب خوەبوون و ھەستکرن ب بەرپرسایەتیێ یە ل بەرامبەر مافێن ڕەوا یێن کوردستانیان.

ئەڤین سەلیم مزیری، بەربژارا ژمارە (٢٥) یا پارتی دیموکراتی کوردستان ل بازنێ (١) (دھۆک – ئامێدیێ) بۆ مالپەرێ فەرمیێ پارتی دیموکراتی کوردستان گۆت: "ھەکە من باوەریا خەلکی ب دەست خوەڤە ئینانا و ب دەنگێن وان چوومە جڤاتا نوونەرێن عیراقێ، د بەرنامێ من دایە کو بەرەڤانیێ ژ پیرۆزی و دەستکەفتێن ھەرێما کوردستانێ د دستوورێ عیراقێدا بکەم، ھەروەسا ئێکگرتنا ناڤ مالا کوردی ژی ل جڤاتا ناڤھاتی چێ بکەم و ھەمی ھێز و شیانێن خوە دێ بکار ئینم کو ب ھووربینی کار ل سەر مافێن رەوا یێن ھەرێما کوردستانێ بکەم ل دووڤ بسپۆریا خوە د بوارێ ئابووری و دارایی و کارگێریدا بۆ چارەسەرکرنا ئاریشێن ھەرێمێ یێن ھەلاویستی ب شێوەیەکێ دبلۆماسی و ئاکادیمی، چونکو پتریا ئاریشێن مە دگەل حکوومەتا فیدڕال یێن ئابووری نە، سەرەرایی ڤێ چەندێ دێ کار ل سەر تەخا گەنجام کەم و دێ ھاندانا وان کەم بۆ کەلتۆرێ فێربوونا کارێن داخوازی ل سەر خزمەتا وان ھەی د ھەمی بواران دا، ھەروەسا دێ ھەمی بزاڤان کەم دانپێدان ب ھەمی پەیمانگەە و زانکۆیێن ھەرێما کوردستانێ بھێتەکرن و دەرچوویێن پەیمانگەە و زانکۆیان بھێنە دامەزراندن و کورسێن خواندنێ ژ دەرڤەی وەلاتی بھێنە دابینکرن".

ناڤھاتیێ ئاماژە دا وێ چەندێ کو تایبەتمەندیا پارتی دیموکراتی کوردستان ل دەف وێ تایبەتمەندیەکا روحی نشتمانپەروەرییە، پارتی حزبا دەستھەلاتدارە ل سەر ئاستێ عیراقێ و ھەرێما کوردستانێ و مێژوو دیدەڤانە ل سەر خوەڕاگریا پارتی، ژ بەر کو پارتی قوتابخانا کوردایەتی و نەتەوەیی یە و ڤەرێژا وێ باوەری ب خوەبوون و ھەستکرن ب بەرپرسایەتیێ یە بەرامبەر پاراستنا مافێن ڕەوا یێن کوردستانیان، ھەروەسا خالا گرنگ ھەر پارتی بوویە حکوومەتا عیراقێ نەچار کری پەنایێ ببەتە بەر زمانێ دیالۆگ، زمانێ کوردی ببیتە زمانەکێ فەرمی ل عیڕاقا فیدڕال، ھەروەسا دامەزراندنا پەرلەمان و حکوومەتا ھەرێما کوردستانێ و ھەتا دگەھیتە رووخاندنا رژێما بەعس و ژناڤبرنا ئەفسانەیا تیرۆرستێن داعش و ئەنجامدانا ریفراندومێ ب سەرکێشیا جەنابێ سەرۆک (مەسعود بارزانی) و گۆت: "ب شانازیەکا گەلەک مەزن ڤە پارتی دیموکراتی کوردستان تایبەتمەندی و روحەکا مەزن د ناڤ دل و دەرونێ من دا ھەیە، بەلکو نەلدەف من بتنێ تایبەتمەندی ل دەف ھەمی خەلکێ کوردستانێ ھەیە و مێژوو ل سەر خۆڕاگریا پارتی دیدەڤانە، ھەبوونا ئەندامێن کورد ل جڤاتا نوونەرێن عیراقێ گرنگیەکا تایبەت بۆ کوردستانیان ھەیە، چونکو بنگەھێ چارەنڤیسێ سەرتاسەری یە ل عیراقێ و کوردستانێ و چەند ئێکگرتن دناڤبەرا ئەندامێن کورد دا ل جڤاتا ناڤھاتی پتر بیت دێ پتر شێن بەرەڤانیێ ژ ماف و بەرژەوەندیێن ھەرێما کوردستانێ کەین".

بەربژارا ژمارە (٢٥) یا پارتی دیموکراتی کوردستان ل بازنێ (١) (دھۆک – ئامێدیێ) خویا کر کو حکوومەت و دەستھەلات پێدڤیە رێخوەشکەر بن بۆ ڤان ھەلبژراتنان ژ بەر کو ئەو وەکو بەربژار بتنێ دشێت رێیێن دبلوماسی بکار بینیت، بۆ وێ چەندێ گرنگیا ڤان ھەلبژارتنان بۆ خەلکی دیار کەت و گۆت: "ب دیتنا من دەمێ بۆ ئەنجامدانا ڤان ھەلبژارتنان ھاتیە دەستنیشانکرن یێ گۆنجایە، ئەڤ ھەلبژاتنە یێن پێشوەختن بۆ جڤاتا نوونەرێن عیراقێ، چونکو ئەڤ حکوومەتا نوکە دەستھەلاتداریێ دکەت حکوومەتەکا بەروەخت بوو و گرنگترین ئەرکێن وێ ئەو بوون ئامادەکارییان بۆ ئەنجامدانا ڤان ھەلبژارتنان بکەت، ژ بەر کو حکومەتا عیراقێ گەلەک یا لاواز بوو و د شیانێن وێ دا نەبوو خزمەتگۆزاریان بۆ وەلاتیان ئەنجام بدەت و گەندەلیێ بنبڕ بکەت و گرۆپێن چەکداری یێن دەرڤەی یاسایێ لاواز بکەت".

ئەڤین سەلیم مزیری، مامۆستایا زانکۆیێ پرۆڤیسۆرا ھاریکارە، وەکو مامۆستا ل پەیمانگەھا تەکنیکی یا دھۆک زانکۆیا پۆلیتەکنیکی کار دکەت، د پسپۆرێن ئەکادیمی دا بۆ دەمێ چەندین سالا سەرۆکا پشکا کارگێری کار ل کۆلیژا تەکنیکی یا دھۆک ل زانکۆیا پۆلیتەکنیکی یا دھۆکێ بوو، دووڤ دا بوویە ھاریکارا ڕاگرێ پەیمانگەھا ناڤھاتی و دووڤ دا بوویە ھاریکارا ڕاگرێ کۆلیژا تەکنیکی یا دھۆک، چەندین ڤەکۆلینێن زانستی و ئەکادیمی بۆ لاپەرێن گۆڤار و رۆژنامێن ناڤخۆیی و جیھانی نڤیساینە، ھەروەسا پشکداری د چەندین وورک شۆپ و سمیناران دا ل ناڤخۆ و دەرڤەی وەلاتی کریە و نوکە بەربژارا ژمارە (٢٥) یا پارتی دیموکراتی کوردستانە ل بازنێ (١) (دھۆک – ئامێدیێ).

رێوار محەمەد رەشید