ئۆرەیی بۆ KDP: پارتی خۆی نەدزیوەتەوە بۆیه‌ش براوەی یەكەم دەبێ
ئامێدی-KDP.info- بەرپرسی لقی ١٨ـی پارتی دیموكراتی كوردستان لە ئامێدی دەڵێ، پارتی تاكە هێزە لەگەڵ ئێش و ئازاری خەڵك ژیاوە و گوێی لە نەهامەتییەكانی خەڵك گرتووە، هیچ كاتێكیش خۆی نەدزیوەتەوە لە داواكاریی پێكهاتەكان و بایەخی بە هەموو چین و توێژەكان داوە، بۆیە لەم هەڵبژاردنەشدا براوەی یەكەم دەبێت.
عومەر ئۆرەیی، بۆ ماڵپەڕی فەرمیی پارتی دیموكراتی كوردستان گوتی: "خەڵك متمانەی زۆری بە پارتی هەیە و پێشوازییەكی گەورە لە پارتی دەكرێ، هەروەها كاندیدانی پارتی لەلایەن خەڵكەوە پێشوازییەكی گەرمیان لێ دەكرێ و بانگەشەیەكی مۆدێرنیش بە بەرنامە و پلان و بە شێوەیەكی هێمنانە دەكەین".
ئۆرەیی گوتیشی: "ئێمە لە سنووری خۆمان یەك كاندیدمان هەیە و بە دڵنیاییەوە دەڵێم كاندیدی پارتیمان لە بازنەی ئامێدی - دهۆك سەردەكەوێ، چونكە هەمیشە پارتی هەڵقوڵاوی ناو جەماوەر بووە و خەڵكیش متمانەی بە كاندیدی پارتی هەیە و دەنگی پێ دەدەن".
ئاماژەشی دا: "پارتی لە هەموو بازنەكان ئامادەكاریی تەواوی كردووە و ئێمە لەنێو خەڵكین؛ هیچ كاتێكیش پارتی و خەڵك لە یەك جیا نەبوونەتەوە، بۆیەشە خەڵك پێشوازییەكی گەرم لە پارتی دەكات و بێگومان براوەی یەكەم دەبێت".
كــاروان بــاعەدری
