سوبەھی زانکۆیا دھۆک دێ کۆنفرانسەکێ نێڤدەولەتی ل دۆر شۆرەشا ئەیلۆلێ گێریت
دھۆک-KDP.info- ب ھەلکەفتا بیرەوەریا ٦٠ سالیا شۆرەشا ئەیلۆلێ سوبەھی رۆژا ١٢/٩/٢٠٢١ێ ل دەمژمێر ١٠:٠٠ سپێدێ زانکۆیا دھۆک ب ھەماھەنگی دگەل دەستەیا ئینسکلوپیدیا پارتی دیموکراتی کوردستان دێ کۆنفرانسێ زانستی یێ نێڤدەولەتی یێ سێیێ ل ژێر ناڤێ (شۆرەشا ئەیلۆلێ وەرچەرخانەک د دیرۆکا سیاسی یا کوردی دا) ل ھۆلا کۆنگرەیان ل زانکۆیا دھۆکێ گێرن و بۆ دەمێ دو رۆژان دێ یێ بەردەوام بیت.
د. نەشوان شوکری، رێڤەبەرێ سەنتەرێ بێشکچی ل زانکۆیا دھۆک و سەرۆکێ کۆنفرانسی بۆ مالپەرێ فەرمیێ پارتی دیموکراتی کوردستان دیار کر کو وان دڤێت ب رێیا گێڕانا ڤی کۆنفرانسی چەندین ئارمانجان بجە بینین ئێک ژ وان ئارمانجان ژی دانەنیاسینا شۆرەشا ئیلۆلێ یە ژ بەر کو شۆرەشەکا نەتەوەیی بوو و کوردستان ھەمی ب خوە ڤە گرتبوو و رێکوپێکیەکا مەزن تێدا ھەبوو ژ لایێ فێرکرنێ و کارگێری و لەشکری ھتد... ڤە و گۆت: "مێھڤانێن ڤی کۆنفرانسی دێ ژ وەلاتێن (ئەلمانیا و ئیرانێ و عیراقێ) پشکداربن، ئەم دشیاین مێھڤانان ژ چەندین وەلاتێن دی ژی پشکدارکەین، بەلێ شۆرەشا ئیلۆلێ ب خوە یا گرێدایی کوردانە ژ بەر ڤێ چەندێ مە گەلەک مێھڤان ژ دەرڤەی وەلاتی داخواز نەکرینە".
ناڤھاتی ئاماژە دا وێ چەندێ کو ٢٤ ڤەکۆلین د ڤی کۆنفرانسی دا د پشکدارن و یێن ھاتینە چاپکرن وەکو چالاکیێن کۆنفرانسی، ھەروەسا وان ٢١ پەرتووک ژی ل دۆر شۆرەشا ئەیلۆلێ ب زمانێن کوردی و عەرەبی چاپکرینە دێ د ڤی کۆنفرانسی دا ھێنە نیشادان".
ل دووماھیێ د. نەشوانی خویا کر کو ب شێوەیێ ئۆنلاین ژی دێ پشکداری د ڤی کۆنفرانسی دا ھێتەکرن، سەرەرایی ڤێ چەندێ ژی ھەر کەسەکێ حەز ھەبیت دشێت ل جھێ ئەنجامدانا کۆنفرانسی ئامادە ببیت و گۆت: "ژ بەر گرتنەبەرا رێکارێن ساخلەمیێ بۆ خوەپاراستن ژ ڤایرۆسێ کۆرۆنایێ مە گەلەک داخوازنامە بۆ ئامادەبوونێ د ڤی کۆنفرانسی دا بەلاڤ نەکرینە".
رێوار محەمەد رەشید
