سەگڤان یوسف بشار سندی: پارتی بەردەوام خوە ل مافێن رەوا یێن خەلکێ کریە خودان

دھۆک-KDP.info- بەربژارێ ژمارە (٢١) یێ پارتی دیموکراتی کوردستان ل بازنێ (زاخۆ – سێمێل) دیار کر کو پارتی حزبەکا مەزنە ل عیراقێ و ب پلان کاردکەت بۆ خزمەتکرنا خەلکێ کوردستانێ و بەردەوام خوە ل مافێن رەوا یێن خەلکێ خوە کریە خودان و گۆت: "چارەسەریا ھندەک ئاریشان دێ ب ئەنجامدانا ھەلبژارتنێن پێش وەخت یێن جڤاتا نوونەرێن عیراقێ ھێتەکرن". 

سەگڤان یوسف بشار ئاغا سندی، بەربژارێ ژمارە (٢١) یێ پارتی دیموکراتی کوردستان ل بازنێ (زاخۆ – سێمێل) بۆ مالپەرێ فەرمیێ پارتی دیموکراتی کوردستان ئاشکرا کر کو ئەگەر ب دەنگێ خەلکی باوەری ب وی ھاتە دان و چۆیە جڤاتا نوونەرێن عیراقێ، دێ ب گشتی بەرنامێ وی یێ پارتا وی پارتی دیموکراتی کوردستان بیت، کو بەردەوام خوە ل مافێن رەوا یێن خەلکێ خوە کریە خودان، پارتی حزبەکا مەزنە ل عیراقێ و ب پلان کاردکەت بۆ خزمەتکرنا خەلکێ کوردستانێ، ئەو ژی وەکو بەربژارێ وێ پارتێ سۆزێ ددەت ئەگەر بوو ئەندام ل جڤاتا نوونەران کێمتەرخەمیێ ناکەت بۆ خزمەتکرنا خەلکێ خوە یێ خوەشتڤی و گۆت: "ئەڤا نوکە ل سنوورێن ھەرێما کوردستانێ ھەی، ئەو ژی ھەبوونا پەکەکێ و تۆپبارانا تورکیا ب وان دەڤەران نە ئاریشەیەکا نوویە، بەلکو بۆ دەمێ چەندین سالانە ئەڤ ئاریشە ل وان دەڤەرێن سنووری یا ھەی و ھەر دوو ئالی ژی سەروەریا ئاخا ھەرێما کوردستانێ و عیراقا فیدرال بن پێ دکەن، ژبەر ڤێ چەندێ دڤێت ئەم ل جڤاتا نوونەرێن عیراقێ ب ھەمی شیانێن خوە کار بکەین بۆ وێ چەندێ سنوورەک بۆ وێ ئاریشێ بێھتە دانان، ژ بەر کو پاراستنا سنووران ئەرکێ حکومەتا ناڤەندی یە، ژ بەر وان تۆپبارانا، ب سەدان گوندێن سندی و گولی و بەرواریان و رێکان و نێروە ھاتنە ڤالاکرن، ھەر چو نەبیت ژ بەر وان زیانێن ژ ئەگەرێن تۆپبارانان گەھشتینێ بھێنە قەرەبووکرن و ئارامی ڤەگەریتە وان دەڤەران".

ناڤھاتی ئاماژە دا وێ چەندێ کو جیھان ب گشتی و رۆژھەلاتا ناڤین و عیراق ب تایبەتی د قوناغەکا جودا دا دەرباز دبن ژ بەر ڤێ چەندێ ئەنجامدانا ڤان ھەلبژارتنان گرنگیا خوە بۆ عیراقێ ھەیە، بەلگە ژی بۆ ڤێ چەندێ نەتەوێن ئێکگرتی و ئەمریکا و بریتانیا و فەرەنسا و چەندین وەلاتێن دی ژی دگەل ئەنجامدانا ڤان ھەلبژارتنان بوون، حزب و ئالیێن عیراقی و حزبێن کوردی ژی دگەل ئەنجامدان ڤان ھەلبژارتنان بوون، ئێک ژ وان کەسێن کو پشتەڤانیا ب رێڤەچوونا ڤان ھەلبژاتنان دکر جەنابێ (سەرۆک بارزانی) بوو، ژ بەر شارەزایەکا مەزن و سەربوورەکا درێژ د سیاسەتێ دا ھەیە، ژ بەر ڤێ چەندێ ئەڤ ھەلبژارتن نەبتنێ بۆ عیراقێ بەلکو بۆ ھەرێما کوردستانێ ژی گەلەک د گرنگن و گۆت: "بلندکرنا رێژەیا خەلکی د ھەلبژارتنان دا نە ب تنێ ل سەر ملێن بەربژارانە، راستە بەربژار ژی پشکەکن ژێ، بەلێ پێدڤیە پارتا مە ژی و دەزگەھێن راگەھاندنێ ژی ھاریکار بن و بۆ خەلکی دیار بکەن کو ئەڤ ھەلبژارتنە چەند د گرنگن و دەنگی بدەنە پارتی دیموکراتی کوردستان، ژ بەر کو ھندی کورسیەکا پارتی ل پەرلەمانێ عیراقێ زێدەبیت دێ مافێن گەلێ کورد مسوگەرتر بن و خەلکێ کوردستانێ ژی گەھشتینە وێ باوەریێ کا د دەمێ بووری دا کێ پتر خزمەتا گەلێ خوە کریە، ئەم رۆژانە سەرەدانا خەلکێ خوە دکەین ل بازنێ (زاخۆ – سێمێل) یا پتر ئەم داخواز ژ وان دکەین ئەوە کو ب گەرم و گوری پشکداریێ د ھەلبژارتنان دا بکەن، بەلێ داخوازا وان ژی ئەوە کو پتر مافێ گەلێ کورد بھێتە پاراستن و ب دروستی دستوورێ عیراقێ بھێتە جێبەجێکرن و ژ ئالیێ ئابووری ڤە ئیدی بۆدجە و مووچێ خەلکی نەھێتە بڕین و ئارامی بۆ دەڤەرێن سنووری ڤەگەرت، لێ ئەم د گەشبینین، ژ بەر کو پارتا مە پارتی دیموکراتی کوردستان کەسێن ژێ ھاتی بەربژار کرینە و وەکو خۆلێن بووری یێن جڤاتا نوونەران دێ بەرەڤانیێ ژ مافێن خەلکێ خوە کەن".

ل دووماھیێ بەربژارێ ژمارە (٢١) یێ پارتی دیموکراتی کوردستان ل بازنێ (زاخۆ – سێمێل) گۆت: "ب دیتنا من دەم بۆ ئەنجامدانا ڤان ھەلبژارتنان یێ گۆنجایە، ھەر چەندە درەنگە ژی پێدڤی بوو ل ھەیڤا گۆلانێ ھاتبانە ئەنجامدان، ژ بەر کو حکومەتا عیراقێ پێدڤی ب نویکرنێ ھەیە، د ڤێ کابینا دووماھیێ دا چەند سەرۆک وەزیر ھاتنە گوھۆڕین و دەست ژ کار کێشان ب ھەر ئەگەرەکێ ھەبیت، ڤێ چەندێ ژی باوەری ل دەڤ خەلکی کێم کر، بەلێ ب ئەنجامدانا ڤان ھەلبژارتنێن پێش وەخت دێ ھندەک ئاریشە چارەسەر بن و مە دڤێت د ڤێ کابینێ دا کوردان رۆلەکێ سەرەکی ھەبیت د ئاڤاکرنا وێ دا و ئیدی مافێن مە د عیراقا فیدرال دا نەھێنە خوارن".

سەگڤان یوسف بشار ئاغا سندی، ژدایکبوویێ سالا ١٩٦٢ یە ل زاخۆ، باوەرناما بەکالۆریۆس ب زانستێن لەشکری - کۆلیژا بەغدا ب دەست خوەڤە ئینایە و پلەیا وی یا لەشکری عەمید و شیرەتکارێ سەربازیە، ئاکنجیێ قەزا زاخۆ یا سەر ب پارێزگەھا دھۆکێ ڤە یە، زمانێن (کوردی، عەرەبی، تورکی) دزانیت، نوکە ژ لایێ پارتی دیموکراتی کوردستان ڤە بۆ جڤاتا نوونەرێن عیراقێ ھاتیە بەربژارکرن ب ژمارە (٢١) ل بازنێ (زاخۆ - سێمێل) یێ پارێزگەھا دھۆکێ. 

 

رێوار محەمەد رەشید