خالد ئەحمەد: پارتی هەمی بەرهەڤی بۆ بانگەشەیا هەلبژارتنان ل دهۆکێ کرینە
دهۆک-KDP.info- بەرپرسێ هەلبژارتنان ل لقێ ئێک یێ پارتی دیموکراتی کوردستان دیار کر کو پارتی دیموکراتی کوردستان هەمی بەرهەڤی بۆ بانگەشەیا هەلبژارتنێن جڤاتا نوونەرێن عیراقێ کرینە و سوبەهی رۆژا شەمبی 11/9/2021 جودا ژ هەلبژارتنێن سالێن بۆری دێ ب شێوەیەکێ فەرمی دەست ب بانگەشەیا ناڤهاتی ل سنوورێ پارێزگەها دهۆکێ هێتە کرن.
خالد ئەحمەد، بەرپرسێ هەلبژارتنان ل لقێ ئێک یێ پارتی دیموکراتی کوردستان بۆ مالپەرێ فەرمیێ پارتی دیموکراتی کوردستان ئاشکرا کر کو بۆ خۆ گۆنجاندن دگەل رەوش و سەقایێ ئەڤرۆ بانگەشە تێدا دهێتە برێڤەبرن وان بزاڤ کرینە کو ب رێیا بەرنامێن تایبەت و رێکخستنا بازنێن جەماوەری پەیوەندی دگەل هەمی مال و تاکان بهێتەکرن، ئەڤە ددەمەکی دایە سەرەدان ژ لایێ بەربژارێن پارتی ڤە د بەردەوامن بۆ کەسایەتی و تەخ و چینێن جودا و د رۆژێن داهاتی دا دێ بانگەشە و پەیاما پارتی و بەربژارێن پارتی ل سەر ئاستێ میدیایی و سوشیال میدیایێ ژی دا پتر دیاربیت و گۆت: "سوبەهی رۆژا شەمبی 11/9/2021 دێ ب شێوەیەکێ فەرمی دەست ب بانگەشەیا ناڤهاتی ل سنوورێ پارێزگەها دهۆکێ هێتە کرن و دێ پوستەر و وێنێن بەربژاران ل سەر جادان و جهێن تایبەت هێنە بەلاڤکرن، هەروەسا میدیایێن پارتی ژی دێ ب شێوەیەکێ فەرمی دەست ب بانگەشەیا هەلبژارتنان کەن، هەروەسا ل سەر ئاستێ جەماوەری ژی چەندین بەرنامە هاتینە رێکخستن دێ کار پێ هێتەکرن".
ناڤهاتی ئاماژە دا وێ چەندێ کو سوبەهی چالاکیەکا ناڤەندی ل سەر ئاستێ سەرکردایەتیا پارتی دیموکراتی کوردستان دێ هەبیت بۆ راگەهاندنا ڤێ بانگەشەیێ و ئەو چالاکی ب شێوەیەکێ فەرمی دێ دەربڕینێ ژ ناساندنا هەمی بەربژارێن پارتی و پەیاما پارتی کەتن و ئامادەبوون ژی دێ گەلەک یا سنووردار بیت ژ بەر گرتنەبەرا رێکارێن ساخلەمیێ بۆ خۆ پاراستن ژ ڤایرۆسێ کۆرۆنایێ، ئەڤ سالە جودا ژ سالێن بۆری ب چو شێوەیان خرڤەبوونێن مەزن بۆ راگەهاندنا بانگەشە و پەیاما پارتی بۆ هەلبژارتنێن جڤاتا نوونەرێن عیراقێ ناهێنە ئەنجامدان داکو بانگەشە نەبیتە ئەگەرێ وێ چەندێ کو ئەڤ ڤایرۆسە پتر بەلاڤ بیت.
هەژی گۆتنێ یە کو سوبەهی رۆژا شەمبی 11/9/2021 دێ د رێورەسمەکێ ژ هەژی دا چالاکیەک ژ لایێ سەرکردایەتیا پارتی دیموکراتی کوردستان ڤە ب ئامادەبوونا سەرۆک (مەسعود بارزانی) ل هەولێرا پایتەخت بۆ راگەهاندنا بانگەشەیا هەلبژارتنان و دیارکرنا پەیاما پارتی و دانەنیاسینا بەربژارێن پارتی هێتە ئەنجامدان.
رێوار محەمەد رەشید
