دەست ب تمامکرنا پرۆژێ بەنداڤا (خنس) ھاتە کرن
دھۆک-KDP.info- رێڤەبەرێ سکرێ دھۆکێ دیار کر، کو پشتی بۆ دەمێ حەفت سالان ژ ئەگەرێ قەیرانا دارایی کارکرن د پرۆژێ بەنداڤا (خنس) دا ل سنوورێ قەزا شێخان یا سەر ب پارێزگەھا دھۆکێ ڤە ھاتیە راوەستاندن دوھی رۆژا ٨/٩/٢٠٢١ دووبارە دەست ب تمامکرنا پرۆژێ ناڤھاتی ھاتە کرن.
ئەندازیار فەرھاد محەمەد تاھر، رێڤەبەرێ سکرێ دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو ل سالا ٢٠١٤ێ ژ ئەگەرێ وێ قەیرانا دارایی یا سەر ب ھەرێما کوردستانێ دا ھاتی، کارکرن د پرۆژێ بەنداڤا (خنس) دا ھاتبوو راوەستاندن، بەلێ ل سەر فەرمانا سەرۆکێ حکومەتا ھەرێما کوردستانێ و بزاڤێن بەردەوام یێن وەزارەتا چاندن و ژێدەرێن ئاڤێ یا حکومەتا ھەرێما کوردستانێ و پارێزگەرێ دھۆکێ دوھی رۆژا ٨/٩/٢٠٢١ ێ بۆ رێگریکرن ل ھشکەسالیێ دووبارە دەست ب تمامکرنا پرۆژێ ناڤھاتی ھاتەکرن.
ناڤھاتی ئاماژە دا وێ چەندێ کو ئەڤ پرۆژە ب کوژمێ ھەشت ملیار و ٧٨١ ملیۆن و ٧٠ ھزار دیناران ژ لایێ کۆمپانیەکێ ڤە دھێتە بجهئینان و گۆت: "ڤێ بەنداڤێ شیانێن قەبارەیێ ھەلگرتنا شەش ملیۆن مەترێن سێجا یێن ئاڤێ ھەنە و ل دەمەکێ نێزیک دێ ب دوماھی ھێت و کەڤیتە د خزمەتا خەلکێ دەڤەرێ دا ب تایبەتی تەخا جۆتیاران، ژ بەر کو ب سەدان دۆنەمێن ئەردێ چاندنێ دێ پێ ھێنە ئاڤدان.
رێوار محەمەد رەشید
