کلینیک و تاقیگەھەکا ڤێتێرنەری ل دھۆکێ ھاتە ڤەکرن
دھۆک –KDP.info- پەیڤدارێ رێڤەبەریا گشتی یا چاندنێ ل پارێزگەھا دھۆکێ ئاشکرا کر کو د رێورەسمەکی دا ئەڤرۆ رۆژا ١/٩/٢٠٢١ کلینیک و تاقیگەھەکا ڤێتێرنەری ب ئامادەبوونا (ماجد سەید سالح) جێگرێ پارێزگەرێ دھۆکێ و رێڤەبەرێ گشتی یێ چاندنێ ل پارێزگەھا دھۆکێ و چەندین نۆشدارێن ڤێتێرنەری ل سەنتەرێ پارێزگەھا دھۆکێ ھاتە ڤەکرن.
ھەرھین محەمەد، پەیڤدارێ رێڤەبەریا گشتی یا چاندنێ ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو بۆ جارا ئێکێ یە ل سەر ئاستێ پارێزگەھا دھۆکێ کلینیکەکا تایبەت کو د شیانێن وێ دا بیت ھەمی ئاریشێن ئاژەلی و پەلەوەران چارەسەر بکەت ل دھۆکێ بھێتەڤەکرن و گۆت: "کابینا نەھێ یا حکومەتا ھەرێما کوردستانێ گەلەک پشتەڤانی ل کەرتێ تایبەت د ھەموو بوارێن ژیانێ دا کریە و ئەڤ کلینیک و تاقیگەھە ژی ئێکە ژ پرۆژێن کەرتێ تایبەت کو ب کوژمێ ١٢٠ ھزار دۆلاران ھاتیە ڤەکرن".
ناڤھاتی ئاماژە دا وێ چەندێ کو جۆتیارێن ھەرێما کوردستانێ ب شێوەیەکێ گشتی و یێن پارێزگەھا دھۆکێ ب تایبەتی دێ گەلەک مفایی ژ ڤێ کلینیک و تاقیگەھێ بینن، ژ بەر کو بەری نوکە چو کلینیک و تاقیگەھێن ب ڤی شێوەیی ل پارێزگەھا دھۆکێ نەبوون، ھەروەسا ئەڤ کلینیک و تاقیگەھە دێ ب دەھان دەلیڤێن کاری بۆ نۆشدارێن ڤێتێرنەری و دەرچوویێن زانکۆیان و گەنجێن پارێزگەھا دھۆکێ پەیداکەت.
رێوار محەمەد رەشید
