- بازرگانەکێ ماددێن ھۆشبەر ل شێلادزێ ھاتە دەستەسەرکرن

- تۆمەتبارەک ب شەش کیلۆیێن ماددێن ھۆشبەر ڤە ل شێلادزێ ھاتە دەستەسەرکرن
دھۆک-KDP.info- بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ ئاشکرا کر کو ل درەنگیا شەڤا بۆری تۆمەتبارەک ب شەش کیلۆیێن ماددێن ھۆشبەر ڤە ل ناحیا شێلادزێ یا سەر ب قەزا ئامێدیێ ڤە ھاتە دەستەسەرکرن، ھەروەسا د رۆژێن بۆری دا چەندین جھێن قۆمارا ئەلکترۆنی ل پارێزگەھا دھۆکێ ھاتینە داخستن و خودانێن وان ھاتینە دەستەسەرکرن و دەست ب سەر کەلوپەلێن وان دا ھاتیە گرتن.

موقەدمێ مافپەروەر ھێمن سلێمان، بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ ئەڤرۆ رۆژا پێنجشەمبی ٢٦/٨/٢٠٢١ د کۆنگرەیەکێ رۆژنامەڤانی دا ئاشکرا کر کو پشتی پێزانین ھاتینە کۆمکرن کو کەسەک ل سەنتەرێ ناحیا شێلادزێ بازرگانیێ ب ماددێن ھۆشبەر دکەت دوڤچوونەکا ھویر ژ لایێ پۆلیسێن نەھێلانا گۆنەھباریان نڤیسینگەھا شێلادزێ ڤە ھاتەکرن و ل شەڤا ٢٥ ل سەر ٢٦/٨/٢٠٢١ ل دەمژمێر ٢:٣٠ شەڤ پۆلیسێن قەزا ئامێدیێ ب ھەڤکاری دگەل پۆلیسێن نڤیسینگەھا ناڤھاتی ب سەر مالا وی تۆمەتباری دا گرت و تۆمەتبار دەستەسەرکر و د ھەمان دەم دا دەست ب سەر شەش کیلۆیێن ماددێن ھۆشبەر دا ھاتە گرتن و گۆت: "پشتی تۆمەتبار ب ناڤێ (س،ج،م) د ژیێ ٥٠ سالیێ دا کو خەلکێ ناحیا شێلادزێ بوو ھاتیە دەستەسەرکرن دانپێدان ب تاوانا خوە کریە و د دەمێ ڤەکۆلینێ دا دیاربوو کو وی ئەڤ ماددێن ھۆشبەر ب مەرەما بازرگانیکرنێ ئینابوونە د ناڤ مالا خوە دا و نوکە ل دووڤ بەندێ ٢٥ ژ یاسایا ماددێن ھۆشبەر ئەڤ تۆمەتبارە یێ ھاتیە ڕاگرتن و ب بڕیارا دادوەرێ ڤەکۆلینێ دێ بۆ دادگەھێ ھێتە رەوانەکرن".

ناڤھاتی ئاماژە دا وێ چەندێ کو نوکە ھەوەکەکا بەرفرەە ژ لایێ پۆلیسێن پارێزگەھا دھۆکێ ڤە بۆ نەھێلانا دیاردێن نەشارتانێ ل پارێزگەھا دھۆکێ دەستپێکریە و د رۆژێن بۆری دا ھژمارەکا تۆمەتباران ب تۆمەتێن (بکارئینانا ماددێن ھۆشبەر، جادوگەری، قۆمار، خراب بکارئینانا سوشیال میدیایێ، دزیێ و ھتد...) ژ لایێ پۆلیسێن پارێزگەھا دھۆکێ ڤە ھاتینە دەستەسەرکرن و دانپێدان ب تاوانێن خوە کرینە. 
رێوار محەمەد رەشید