ئەڤرۆ بیرەوەریا ٣٣ سالیا ئەنفالێن بەھدینان دێ ل دھۆکێ ھێتە ساخکرن
دھۆک-KDP.info- ل ژێر درووشمێ (ئەنفال د بیردانکا مەدایە)، سەنتەرێ ڤەکۆلینێن جینوسایدێ ل زانکۆیا دھۆک ب ھەماھەنگی دگەل رێڤەبەریا شەھید و ئەنفالکریان ل پارێزگەھا دھۆکێ و رێکخراوا ٨٨ یا ناساندنا تاوانێن ئەنفالان ئەڤرۆ رۆژا چارشەمبی ٢٥/٨/٢٠٢١ ل دەمژمێر ٨:٠٠ شەڤ دێ بیرەوەریا ٣٣ سالیا ئەنفالێن بەھدینان ب ئەنجامدانا چەندین چالاکیان ل کەلھا نزارکێ ل باژێرێ دھۆکێ ساخ کەن.
د. سالم جاسم حاجی، رێڤەبەرێ سەنتەرێ ڤەکۆلینێن جینوسایدێ ل زانکۆیا دھۆک بۆ مالپەرێ فەرمیێ پارتی دیموکراتی کوردستان ئاشکرا کر کو ب ھەلکەفتا بیرەوەریا ٣٣ سالیا ئەنفالێن بەھدینان ئەڤرۆ دێ ٣٣ شەمالک د ناڤ پەنجەرێن کەلھا نزارکێ دا ل باژێرێ دھۆکێ ھێنە ھەلکرن ئەو کەلھا گەلێ کورد ب دەستێن رژێما دکتاتۆر یا ژناڤچوویا عیراقێ دھاتە زیندانکرن و ئەشکەنجەدان، ھەروەسا د ھەمان دەم دا دێ پرێس کۆنفرانسەک ژی ھێتە ئەنجام دان و دێ د بەیاننامەکێ دا داخوازێ کەن کو تاوانێن ئەنفالێن بەھدینان نەھێنە ژبیرکرن و پتر گرنگی ب بابەتێ ئەنفالان و جینوسایدێ بھێتەدان و د رۆژێن داھاتی ژی دا دێ چەندین چالاکی ب ڤێ ھەلکەفتێ ل دھۆکێ ھێنە ئەنجامدان و گۆت: "دێ ھەمی بزاڤان کەین کەلھا نزارکێ ببیتە مۆزەخانەکا مەزن بۆ جینوسایدێن ب سەرێ مللەتێ کورد ھاتین".
ناڤھاتی ئاماژە دا وێ چەندێ کو د سالێن بۆری دا چالاکیێن جەماوەری یێن مەزن ب ڤێ ھەلکەفتێ ل پارێزگەھا دھۆکێ د ھاتنە ئەنجامدان، بەلێ ئەڤ سالە ژ بەر گرتنەبەرا رێکارێن ساخلەمیێ بۆ خوەپاراستن ژ ڤایرۆسێ کۆرۆنایێ دێ ھاتنا مێھڤانان بۆ ڤێ چالاکیێ یا سنووردار بیت و گۆت: "مەرەم ژ ئەنجامدانا ڤان جورە چالاکیان ب ھەلکەفتا سالیادا ئەنفالێن بەھدینان ئەوە کو ئەنفال و قورتالبوویێن ئەنفالان د بیردانکا مە دا ب زیندی بمینن".
رێوار محەمەد رەشید
