ب کوژمێ پتری ١١ ملیار دیناران پرۆژێن رێیان ل دھۆکێ یێن دھێنە چێکرن
دھۆک-KDP.info- بەرپرسێ راگەھاندنێ ل رێڤەبەریا گشتی یا باژێرڤانیێن پارێزگەھا دھۆکێ ئاشکرا کر کو ٢٩ پرۆژێن رێیان ب کوژمێ پتری ١١ ملیار دیناران دێ ل پارێزگەھا دھۆکێ ھێنە چێکرن و نوکە کار د چێکرنا ژمارەک ژوان پرۆژان دا دھێتەکرن و د قووناغێن جودا دانە.
ئەمیر ئەترووشی، بەرپرسێ راگەھاندنێ ل رێڤەبەریا گشتی یا باژێرڤانیێن پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو د بەردەوامیا چێکرنا پرۆژێن خزمەتگۆزاری دا ل سەر دەمێ کابینا نوی یا حکومەتا ھەرێما کوردستانێ ٢٩ پرۆژێن رێیان ب کوژمێ ١١ ملیار و ٣٧٠ ملیۆن دیناران ل سەر بودجا گەشەپێدانا ھەرێمان دێ ل سنوورێ پارێزگەھا دھۆکێ ھێنە چێکرن.
ناڤھاتی ئاماژە دا وێ چەندێ کو ژ سەرجەمێ وان پرۆژێن رێیان نوکە ١٢ پرۆژە ب سەرپەرشتیا رێڤەبەریا گشتی یا باژێرڤانیان ل پارێزگەھا دھۆکێ یێن کەفتینە د بوارێ جێبەجێکرنێ دا و ئەو پرۆژێن ماین ژی نوکە د قووناغا ئیمزاکرنا گرێبەستان دانە و ل دەمەکێ نێزیک ئەو ژی دێ کەڤنە د بوارێ جێبەجێکرنێ دا.
ل دووماھیێ بەرپرسێ راگەھاندنێ ل رێڤەبەریا گشتی یا باژێرڤانیێن پارێزگەھا دھۆکێ خویا کر کو دوور ژ چێکرنا پرۆژێن چێکرنا رێیان نوکە چەندین باخچە ل قەزایێن سەر ب پارێگەھا دھۆکێ ڤە دھێنە چێکرن و نووژەنکرن، ھەروەسا ڤەدیتن بۆ چەندین پرۆژێن دی یێن خزمەتگۆزاری یێن جودا جودا ھاتیەکرن کو ل ئایندەیەکێ نێزیک بکەڤنە د بوارێ جێبەجێکرنێ دا و بکەڤنە د خزمەتا وەلاتیان دا.
رێوار محەمەد رەشید
