" گەڕانەوەی پارتی بۆ مووسڵ کاریگەری لەسەر گەڕانەوەی کورد دەبێت"

دوای ئەوەی پارتی بڕیاری دا بارەگاکانی لە شاری مووسڵ بکاتەوە بەرپرسی لقی پارتی لە مووسڵ ئاشکرایکرد، بەکردنەوەی بارەگاکانی پارتی کاریگەری لەسەر گەڕانەوەی کوردانی مووسڵ دەبێت و دەشڵێت، بەھۆی مەترسیەوە تا ئێستا  ٥%ی کورد گەڕاوەتەوە مووسڵ.

عەلی خەلیل، بەرپرسی لقی ١٤ی مووسڵ بەماڵپەڕی فەرمیی پارتی دیموکراتی کوردستانی راگەیاند" دوای ھێرشی تیرۆرستانی داعش بۆسەر مووسڵ کوردانی مووسڵ ئاوارەی ھەرێمی کوردستان بوونە و دوای رزگارکردنی مووسڵیش ھاوڵاتیانی کورد ئامادەنین بگەڕێنەوە بۆ شوێنەکانیان، چونکە ژیانیان لەمەترسیدایە و ھیچ گەرەنتیەک بۆ پاراستنی کوردانی مووسڵ نیە، دەتوانم بڵێم تا ئێستا ٥%ی کوردانی دانیشتووی مووسڵ گەڕاونەتەوە شوێنی خۆیان و ئەوانی دیکەیان ھێشتا ئاوارەن.

بەرپرسەکەی پارتی دەشڵێت" لەگەڵ گەڕانەوەی پارتی بۆ مووسڵ کاریگەری لەسەر گەڕانەوەی کوردانی مووسڵ دەبێت، چونکە دەزانن بەگەڕانەوەی پارتی بەشێکی زۆری مەترسیەکانیان نامێنێ و بەگەڕانەوەی بارەگاکانی پارتی کاریگەری لەسەر رەوشی مووسڵ دەبێت، لەبەر ئەوەی خەڵکی مووسڵ چاوەڕێی گەڕانەوەی پارتیش بۆ شارەکە.
عەلی خەلیل ئاماژەی بۆ ئەوەکرد" پێش ئەوەی مەترسی بۆسەر مووسڵ دروست ببێت و گروپە تیرۆرستیەکان پەیداببن لە عێراق ژمارەیەکی بەرچاوی دانیشتوانی مووسڵ لە نەتەوەی کوردبوون، بەڵام بەداخەوە بەھۆی ئەو رەوشەی بەسەر مووسڵدا ھاتوە ئێستا کورد کەمینەیە لە شاری مووسڵ.

قائید میرۆ