سه‌رۆكى هه‌رێمى كوردستان له‌گه‌ڵ باڵیۆزى به‌ریتانیا كۆبووه‌وه
هەولێر-KDP.info- ئێواره‌ى ئه‌مڕۆ یه‌كشه‌ممه 2021/8/9 به‌ڕێز نێچیرڤان بارزانى، سه‌رۆكى هه‌رێمى كوردستان، پێشوازى له به‌ڕێز مارك برایسن ریچاردسن، باڵیۆزى نوێى به‌ریتانیا له عیراق كرد.
له كۆوونه‌وه‌یه‌كدا به‌ڕێز نێچیرڤان بارزانى وێڕاى به‌خێرهێنان، هیواى سه‌ركه‌وتنى له ئه‌ركى تازه‌یدا له عیراق بۆ به‌ڕێز باڵیۆزى نوێى به‌ریتانیا خواست و هه‌موو هاریكارى و پشتگیرییه‌كى هه‌رێمى كوردستانى بۆ سه‌رخستنى ئه‌ركه‌که‌ى دووپات كرده‌وه.
له كۆوبونه‌وه‌كه‌دا بره‌ودان به په‌یوه‌ندییه‌كانى عیراق و هه‌رێمى كوردستان له‌گه‌ڵ بریتانیا و فراوانكردنى بواره‌كانى هاریكارى و هاوبه‌شیى نێوانیان، هه‌ڵبژاردنه‌كانى داهاتووى عیراق، دۆخى ئه‌منى و دوایین په‌ره‌سه‌ندنه‌كانى تیرۆر و هه‌ڕه‌شه و كرده‌وه‌كانى تیرۆرستانى داعش، ئه‌ركى هاوپه‌یمانیى نێوده‌وڵه‌تیى دژى داعش له عیراق، هه‌ماهه‌نگیى نێوان پێشمه‌رگه و سوپاى عیراق له به‌ره‌نگاربوونه‌وه‌ى تیرۆرستان، دوایین دۆخى بڵاوبوونه‌وه‌ى په‌تاى كۆڤیدـ19 و به‌ره‌نگاربوونه‌وه‌ى له عیراق و به‌ریتانیا، تاوتوێ كران.
له كۆبوونه‌وه‌كه‌دا جه‌خت له خواستى دوولایه‌نه بۆ بره‌ودان به په‌یوه‌ندییه‌كانى هه‌رێمى كوردستان و به‌ریتانیا كرایه و ده‌رفه‌تی کار و وه‌به‌رهێنان بۆ که‌رتی تایبه‌ت و کۆمپانیا به‌ریتانییه‌کان له عیراق و هه‌رێمی کوردستان خرایه به‌ر باس.
دۆخی ناوخۆی هه‌رێمی کوردستان، دیالۆگی ستراتیژیی عیراق – ئه‌مه‌ریکا، پەیوەندییەکانی ھەرێمی کوردستان لەگەڵ وڵاتانی دەوروبەر، پرسی سووریا، دوا پەرەسەندنەکانی ناوچه‌كه به‌گشتى و چه‌ند پرسێكى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه بوو كه خاتوو مێل سمارت كونسولى گشتیى به‌ریتانیا به‌وه‌كاله‌ت له هه‌رێمى كوردستان و شاندێکی سیاسی و سه‌ربازیی به‌ریتانی، ئاماده‌ى بوو.
